Sa akong pagbalik-lantaw sa akong panaw ibabaw ning kalibotana, ang nagpalahutay kanako ang abundang pabawon nga gugma gikan sa akong katigulangan. Gimatuto sa paghigugma ug pagamping niini maong sayon ra sab ko mopaambit sa uban.
Ang tanan bunga sa way sukod nga gugma gikan Kahitas-an. Apan wa masayod ang tanan sa nahasulat sa Balaang Kasulatan nga nag-ingon—bisan naa na kanako ang tanan, apan walay paghigugma, wala gihapon koy kapuslanan.
Nakahinumdom pa ko sa mga tawong ang gugma nakatabang paghulma sa akong kinabuhi ug nahimo nakong giya pagpili sa dalan nga akong padulngan. Sila mao ang akong mga apohan, Don Juan Rivera ug Doña Andrea Rivera, nga dili mapul-an paghigugma sa Kahitas-an pinaagi sa pagpaambit sa ilang mga gasa ngadto sa uban.
Ang San Agustin Church nga karon mas nailhan natong Basilica Minore del Santo Niño, puno og mga artifacts nga makita sa mga dumuduong, apan wala sila makahibawo sa mga estorya sa gugma bahin kanila. Pananglitan, kanang dakong krus nga gibitay karon diha sa altar nga ginama sa kahoy, ang akong Lolo Juan maoy nangita niini ug gi-import pa gikan sa Espanya.
Sa pagdagan sa mga katuigan, gibalhinbalhin kini og lain-laing pwesto diha sa sud sa maong simbahan, karon naa kini nahimutang sa tuong bahin kun magatubanga ka sa altar. Matag tinuig nga “Triduum” saulogon diha sa Basilica ang kapistahan sa Santo Cristo de Limpia. Karong tuiga magsugod kini sa September 9 hangtud 11, 2019.
Dunay Santos nga Misa alas-4 sa hapon sa :00 o’clock in the afternoon mass on September 11, Miyerkules.
Ang Santo Cristo de Limpia nagagikan sa gamay nga barrio nga gitawag og Limpias sa Covadonga sa Asturias, didto sa Espanya. Ang pangalang “Limpia” gikan sa init nga bukal nga gitawag og Waters of Limpias. Gamay lang kini nga lugar nga dunay 1,200 ka mga lumolupyo, diha sa maong dapit gitukod ang Church of St. Peter.
Ang mensahe sa imaheng nagpakita sa hulagway pagpasakit kang Kristo samtang naghangad kini sa langit giingon nga magdepende kun asa nga anggulo ang nagtan-aw. Ang ekspresyon ni Hesus nagpakita dili lang sa iyang kasakit kondili may dala kini pagampo ug pagpamalandong.
Si Mama Pining, nahimong sumusunod sa iyang mga ginikanan nga kanunay aktibo sa mga kalihokan ug ginbuhaton sa simbahan kutob sa iyang mahimo.
Dihang gikuha na sa iyang Magbubuhat si Mama Pining niadtong 1984, akong nasunod ang tradisyon sa pamilya nga mohatag. Ug dako akong pasalamat sa Ginoo kay sa akong paghimo niini gisuportahan ako sa akong kapikas nga si Nena.
Ako kamong giimbitahan ilabi na ang kabataan sa pagduyog sa selebrasyon sa Triduum karong tuiga.