Makalibog. Mao kini ang naa sa hunahuna matag usa sa mga Pilipino bahin sa pag-veto ni Presidente Duterte sa Security of Tenure Bill o mas naila nga “Endo” nga kabahin sa mga gisaad niini atol sa iyang pangampanya pagkapangulo niadtong 2016.
Ang rason niya ang balaod nipagamay sa kahulogan sa gidili nga labor-only contracting ug nga kinahanglang tugotan ang mga negosyante nga mopili kun kinahanglan nilang mangontrata og mga trabahante o dili.
Apan bisan unsa pay rason sa presidente, kinahanglan iyaha kining mapasabot sa mosunod nga mga adlaw. Tungod kay sa iyang gibuhat nasagmuyo ang mga mamumuo tungod kay di matinud-anon ang pangulo sa iyang mga saad.
Makasagmuyo tungod kay usa man kini sa iyang mga ‘priority bills.’ Magduha na ka dekada nga gipakigbisogan sa mga mamumuo ang paghunong na niining kontraktwalisasyon tungod kay gigamit kini sa mga negosyante pagabusar sa mga trabahante.
Ang Endo gihimo karong pamaagi sa mga kompanya aron dili makompleto ang unom ka buwang pagpanarbaho sa usa ka empleyado diha kanila. Ang mga empleyado papirmahon ra og kontrata nga lima ka buwan o ba kaha duna gyuy uban way kontrata apan ini og abot sa ikalima ka buwan taktakon na ang empleyado.
Subay sa balaod, ang empleyado nga moabot og unom ka buwan sa pagpanarbaho sa usa ka kompanya gikinahanglang himuong regular nga empleyado nga diin adunay mga benepisyong pakapin niini.
Tungod sa Endo, daghang mga baskog pa og panglawas karon ang naestambay ug way trabaho ug ang uban dili na dawaton tungod sa pangidaron.
Sagad karon sa mga duna nay edad, may mga gibati na sa panglawas nga ilang nakuha gikan sa una nilang mga gitrabahoan, ang resulta bisan tambal wala silay ikapalit.
Ang usa sa mga gitumbok nga hinungdan sa kakabus dinhi sa nasud mao ang kakuwang sa oportunidad nga makatrabaho ang daghang mga Pilipino. Way laing nagmaya karon, ang mga negosyante lamang.