Bag-o na karon ang direktor sa Cebu City Police Office (CCPO) ug makapaabot usab ang mga lumulopyo niining dakbayan sa Sugbo nga padayonon niini ang mga programa ug proyekto nga gipatuman sa iyang gisundan.
Matud pa ni Colonel Gemma Vinluan nga hatagan niya og prayoridad ang mga kaso sa rape ug ubang harassment ngadto sa mga kabayen-an. Kulang kuno kining maong mga klase sa kaso sa pagtagad ug iyang gisaad nga tutokan.
Hinuon niadtong panahon sa iyang predecessor nga si Colonel Royina Garma, kugi kaayo ang kapolisan sa dakbayan sa ilang kampanya batok sa negosyo sa gidiling druga nga hagbay rang mikuyanap sa mga barangay.
Hinuon ang kumbati kontra druga maoy sentro sa kampanya sa administrasyon ni Presidente Rodrigo Duterte. Ug nga mas pakusgan pa niini ang maong krusada sa nahabiling tuig sa iyang pangatungdanan.
Sa panahon ni Garma, hilabihan ka daghan sa druga nga nakonpiska sa otoridad dinhi sa siyudad. Gani sa usa lamang ka operasyon, subra sa P60 milyones nga balor sa druga ang nakuha gikan sa usa ka drug dealer didto sa Barangay Inayawan.
In fairness ni Garma, maayo ang iyang performance dinhi sa dakbayan bisan pa man kon wala makaayon kaniya si kanhi Mayor Tomas Osmeña kay lagi mibutho lamang siya dinhi nga wala mag-agi sa maong mayor.
Hinuon mando kadto ni Duterte, kinsa daan nang mipasangil nga ang lalawigan sa Cebu maoy nag-una sa listahan sa mga lugar sa nasud diin naghitak ang druga. Gani mipasangil pa ang presidente nga daghan sa mga pulis dinhi ang mismo nalambigit sa maong ilegal nga negosyo.
Niining panahon ni Vinluan, hinaut nga mas pakusgan pa sa kapolisan ang ilang kampanya alang sa kahusay ug kalinaw sa siyudad sa Sugbo. Kinahanglan nga iyang ipakita nga wala masayop ang liderato sa Philippine National Police pagtudlo kaniya isip pangulo sa lokal nga puwersa sa kapolisan.