Hulyo 8 nahimo kaming Pilgrims sa Monasteryo sa mga Carmelite Sisters.
As usual, daghan ang tawo. Seminarista pa lang ko, mag-anhaan na gyud ko. Human malitok ang pipila ka mga “Ave Marias” ako molakaw na lang pud binitbit ang paglaum nga paminawon ang akong mga hangyo.
Sa matag higayon nga masulod ko dinhing dapita mosantop sa ako hunahuna ang bantugang Propeta nga si Elias.
Iyang nakita ug nasinati ang Ginoo niya diha sa kahilom ug dili sa kasaba ug katay-og. Dugang pa, mosantop usab sa ako hunahuna nga ang maong propeta mipanaw, nagpuasa ug nag-ampo.
Bisan pa man kun gigukod siya sa pintas nga Rayna nga si Jesebel.
Ang iyang hugot nga pagtuo maoy nibuntog sa mga propeta ni Baal.
Sa katapusan sa tanang Propeta si Elias ra gyud ang gidala sa langit nga wa muagi ug kamatayon.
Akong nakat-onan kining mosunod:
1) Una, sa kinabuhi mahinungdanon ang paghatag ug bili sa kahilom.
Dili tanan anaa sa kasaba ug kagahob.
2) Ikaduha, anaa ang Dios sa tanang mga dapit. Atong sination ang iyang presensiya.
3) Ang pagtungas sa bukid sa kahilom sinugdanan sa atong panaw sa pagkahimatngon nga ang kahilom dili diay depresyon kondili regeneration.