Kuwang pa ug dili pa paigo kining gipatumang kampanya kun matawag ba gyud nga kampanya kini sa gobiyerno ug sa mga local government units kontra sa plastic kay dili man kaayo dako ang nakitang impact niini sa sitwasyon karon sa kalikopan.
Ang Pilipinas ikatulo gihapon sa tibuok kalibotan sa pinakadaghan og plastik nga basurang gitambog sa dagat. Nag-una ang China ug ikaduha ang Indonesia.
Ang maong mga plastik nga basura nitabon sa mga coral reefs nga nakaingon sa pagkamatay niini ug sa mga isdang nagsalig niini.
Samtang ang uban sa ginhawaan na sa mga pawikan, lumod ug mga balyena napunta ug maoy hinungdan sa ilang pagkamatay. Tungod niini, kusog kaayo ang panawagan sa mga nagkadaiyang environmental groups sa mga gobiyerno sa kalibotan nga mohimo sab og mga balaod nga magpahunong na niining paggamit og plastic.
Ang plastic mahinungdanon kaayo nga materyal sa mga gamitonon sa tawo. Apan dili ang tanan dako og gamit kay mas daghan sa inadlaw-adlaw nga gigamit nga plastic kausa ra gamita ug ilabay na dayon ug adto napunta sa kadagatan.
Usa ang Dakbayan sa Sugbo sa mga LGUs nga adunay Plastic Ban Ordinance, apan matag adlaw ra nga Miyerkules kini gipatuman.
Nagpasabot kini nga kausa ra sa usa ka semana way plastic bags, samtang unom ka adlaw nga mogamit sila og plastic bags ang nagkadaiyang grocery stores, department stores, malls, ug labaw sa tanan ang Carbon Public Market ug ang tanang mga establisamento.
Dili lang ang Cebu City ang duna niini ug kaparehas ra’g mga adlaw nga may plastic ban, paigo ba kini para matabangan ang kalikopan?
Kanus-a pa kaha moabot ang mga adlaw nga makapahulay ang dagat gikan sa polusyon?
Kung gusto o seryoso gyud ang gobiyerno ug ang tanan nga matabangan ang kalikopan may mas dako pang mahimo aron may impact ang kampanya kontra plastik ug dili lang usa ka adlaw nga plastik ban ang buhaton sa mga LGUs.