Mayo 12, 2019: Ikalimang Domingo sa Pasko sa Pagkabanhaw
Mga Pagbasa: Buh. 14;21-27/Sal.145/Gip. 21;1-5/Jn. 13;31-35
Kining maong ebanghelyo ang pagabasahon kun dunay kasal nga saulogon. Ning maong paagiha nahimong mas nadungog kini nato sa atong mga dalunggan sa matag higayon nga motambong kita og kasal.
Apan kun buot hunahunaon dili lang kini mahitungod sa kasal sanglit ang gugma alang man sa tanan regardless sa atong kahimtang sa kinabuhi ug sa atong gigikanan.
Ang paghigugma kuyog sa tawag sa pagkabalaan. Ang paghigugma usa ka desisyon nga angayang pilion adlaw adlaw sa atong kinabuhi.
Ang gugma ingon nga desisyon nagpasabot nga ihatag sa mas libre nga paagi. Walay makapugos nimo nga siya imong higugmaon o dili ka kapugos nga sila mahigugma nimo. Apan mas maayo nga imong ipaambit ang imong gugma kay kini man ang tatak sa kinabuhing Kristohanon.
Ikaduha ang sukaranan sa paghigugma sa uban mao ang paghigugma nimo sa imong kaugalingon kay dili ka makahatag og bisan unsa nga wala nimo mahupti.
Ning maong sanglitanan nakita mo ang imong bili ingon nga tawo. Deserving kang higugmaon ug ang unang tawo nga mopakita niini mao gyud ikaw mismo.
Ikatulo mao nga diha sa paghigugma ang tukmang panahon sa paghimo niini karon gyung adlawa kay ang ugma wala nay kasegurohan. Buhata ang maayo sa karon aron dili ka kamahayan.
Ang sunod mao nga diha sa paghigugma aron kini molipang sud-onga ang bisan unsang maayo ug dili ang bisan unsang dautan. Ning paagiha makita nimo ang bili sa tawo ug dili ang iyang sayop.
Makita nimo ang iyang gilaw ug dili ang iyang hugaw. Sama sa gugma sa Ginoo wala niya makita ang atong buling ug kun nakita man gani niya nangita gyud siya og paagi aron kini mahugasan ug malimpiyo.
Aduna Siyay hagit kanato ug mao kining paghigugmaay sa usa’g usa maingon nga siya nahigugma kanato. Magpabilin kita ning maong gugma aron pinaagi niini kita mailhan nga iyang mga tinun-an.
Matud pa niya: Paghigugmaay kamo ingon nga ako nahigugma ako kaninyo! Unta kining maong hagit maoy makapahimo natong maningkamot sa hilabihan sa paghimo og maayo ug dili ang dautan.
Ang paghatag ug dili ang pagpangawat. Ang pagpanalipod ug dili ang panglupig. Gibuhat nato kini tungod sa gugma ug ang gugma mahimong gamhanan kaayo kay iya mang sakupon ang tanan nga nia kanato.