Angayang tug-anan ni Gobernador Hilario Davide III ang mga Sugboanon giunsa niya ang dakong kantidad nga iyang gi-advance gikan sa panudlanan sa probinsiya lima ka adlaw sa dili pa ang eleksiyon.
Sigun sa Check Issuance Monitoring System (CIMS) sa probinsiya sa Sugbo mi-advance og kwarta si Davide gikan sa iyang intelligence fund alang kuno sa “confidential expenses” sa unang quarter sa 2019.
Ang tseke nga dunay numero nga 67088379 naisyu sa probinsiya ngadto ni Davide niadtong Mayo 8. Dili makita pilay kantidad sa tseke diha sa CIMS apan ang akong kasaligang tinubdan miingon nga P10 milyones maoy gi-cash advance sa gobernador.
Angayang hatagan ni Davide og kwentada ang katawhan hain niya gastoha ang maong kantidad aron malikayan ang pagduda nga iyang gipahimuslan ang kwarta sa publiko alang sa iyang kampanya. Dili kalikayan ang pagduda tungod kay ang cash advance nga iyang gihimo alang sa first quarter apan ania naman kita sa ikaduhang quarter sa tuig. Gawas pa iya ning gihimo nga duol na kaayo ang eleksiyon.
* * *
Kapin sa 61 milyones ka mga rehistradong botante lukop nasud ang mag-ambahan ugma aron pagpili sa mosunod nga mga lider sa ilang tagsa-tagsa ka mga probinsiya, syudad, ug lungsod ingon man 12 ka mga senador.
Ang Sugbo maoy nag-una sa 81 ka mga lalawigan sa nasud nga dunay labing daghang botante. Basi sa talaan sa Commission on Elections ang rehistradong botante sa Sugbo alang sa 2019 elections moabot og 3,082,261.
Ang maong gidaghanon naglangkob sa 5 porsiento sa kinatibuk-ang 61,843,750 ka mga rehistradong botante sa Pilipinas. Mao nga ayaw mo katinga nganong gibalikbalikan gyud sa mga kandidato pagkasenador ang Sugbo aron mangampanya.
Gawas sa 12 ka mga senador magpili pud ang katawhan ugma sa ilang sunod nga gobernador, bise gobernador, district congressman, duha ka provincial board members, mayor, bise mayor, ug mga konsehal sa lungsod o ba kaha syudad. Gawas niini duna say mga partylist nga pili-on.
Hinaut nga karon palang andam na ang listahan sa inyong mga pili-on aron mas sayon ug dali ang inyong pagbotar ugma. Labing maayo og nasayod namong daan sa numero sa inyong presinto aron dili mo masaag ugma.