Adlaw karon sa mga Mamumuo o Labor Day, adlaw nga unta magsaulog ug magmaya ang mga trabahador apan selebrasyon ba kaha ang nagtambol karon ilawom sa ilang mga kasing-kasing?
Misaka ang tanang presyo sa palaliton ug serbisyo apan wala mosaka ang suholan sa mga mamumuo. Kinsa may malipay? Ang Department of Labor and Employment (DOLE) mipahibalo nga walay usbaw sa suholan karong selebrasyon sa Labor Day. Kanus-a pa ba gud diay nahitabo nga sa adlaw mismo sa mamumuo may gianunsyong usbaw sa suholan? Ang Regional Tripartite Wages and Productivity Board (RTWPB) hanap pa sa buta mohatag og suholan nga sama sa kadako sa gipangayo sa mga mamumuo kay lagi mapurdoy man sab ang mga negosyante unya manaktak nalang hinuon.
Apan kanunay magdudahan ang mga impluwensyadong miyembro sa board nga sila pabor kanunay ngadto sa mga negosyante kay kung aduna may usbaw nga maaprubahan dili gyud kadtong kantidad nga gipangayo sa mga mamumuo.
Bisan og nimahal na karon ang presyo sa palaliton tungod sa pagsaka sa presyo sa produktong petrolyo ug implimentasyon sa TRAIN law, pabiling nagpakabuta-bungol ang gobiyerno sa tiyabaw sa mga mamumuo.
Swerte nalang ang ubang mamumuo nga nakatrabaho og tarong nga kompanya, apan unsaon nalang kadtong nagtrabahong walay benepisyo, ang sweldo below minimum unya lapas walo ka oras ang trabaho nga walay overtime pay? Usa na niini nga angay subayon sa Department of Labor and Employment mao kining mga security agencies. Daghang mga gwardiya ang nitiyabaw tungod kay wala silay klarong remittance sa ilang SSS, PAG-IBIG Fund ug bisan gani PhilHealth.
Ubos kaayo ang ilang inadlaw nga sweldo unya lapas 12 ka oras pa gyud ang trabaho nga walay overtime pay. Ug usahay wala pa gyuy morelibo.
Kaning mga mamumuoha walay rason aron magmaya ug magselebrar karong petsaha. Gani, dunay uban kanila bisan holiday pa karong adlawa gipatrabaho gihapon ug walay ekstra nga bayad. Angay ba silang malipay?