Nagbaha na ang mga propaganda sa mga kandidato nga nagpahumot sa ilang kandidatora ug nagdaut sa ilang kontra sa politika. Kini atong nadungog sa radyo, nabasa sa mga pamantalaan ug nakita sa mga telebisyon ug social media.
Sa radyo, madungog kini sa mga binayran nga programa, sa pamantalaan, mabasa kini sa gipalit nga espasyo ug sa telebisyon makita kini pinaagi sa gipasalida nga political advertisements.
Sa social media nagbaha gyod og maayo ang propaganda sa mga politiko nga nagpahumot sa ilang kandidatora ug nagdaut sa ilang kontra ug kini gipaagi sa mga accounts nga koniktado sa kandidato ug ilang mga taga suporta.
Busa sa pagpaminaw sa radyo, pagbasa sa pamantalaan ug pagtan-aw sa telebisyon gikinahanglan gayod ang pag-usisa tungod kay kun dili ka makabantay dili ka na makaila asa ang balita ug asa ang propaganda.
Pero ang labing bantayanan mao ang makita ug mabasa sa social media tungod kay nagkalandrakas dinhi ang propaganda nga mipabor ug midaut sa kontra.
* * *
Gipahimangnoan ni Department of Interior and Local Government undersecretary Epimaco Densing III ang mga opisyal sa Barangay sa dili pagpangampanya ug pagkuyog sa mga kandidato sa umaabot nga nasudnon ug lokal nga piniliay. Iya usab nga giawhag ang mga tawo sa pagkuha og video ug hulagway sa mga kandidato nga mikampanya og kandidato ug sa pagsumbong dayon niini sa awtoridad.
Ang barangay gikonsiderar nga apolitical busa, kalapasan sa Batakang Balaud ug Local Government Code ang pagsuporta sa opisyal sa barangay sa mga kandidato sa piniliay.
Pero kining maong balaud kutob lamang sa libro sa balaud ug wala gayod napatuman. Mao ni ang dakong hagit ni Densing. Kun paminawon ba si Densing sa mga opisyal sa barangay nga iyang gidid-an, mao ni ang atong atngan.