Ugma, pormal na gyud nga magsugod ang pagpangampanya sa mga lokal nga kandidato.
Alegre na gyud ni kaayo kay makita ug madungog na ang mga paglampurnas sa mga kandidato nga walay maayong agi ug kadtong gustong mobalik sa katungdanan bisan og bati kaayo ang ilang dungog.
* * *
May nakaestorya ko nga higala gikan sa among lungsod sa San Remigio sa norte nga bahin sa probinsiya sa Sugbo.
Misiaw man sab diay didto ang pustaanay kon kinsa kanila ni Vice Governor Agnes Magpales ug Kongresista Gwen Garcia ang modaog pagka gobernador.
Nasabotan ang pustaanay human sa alegre kuno kaayo nga pagbayloay og mga hunahuna sa mga taga San Remigio, ilabi na sa Barangay Lambusan.
Ang midapig kang Gwen miingon nga daghan kuno kini og nahimo sa iyang pagkagobernador. Apan gitubag kini sa dumadapig sab ni Magpale nga si Gwen, nag-atubang og mga kaso sa Sandiganbayan sa giingong ilegal nga kalihokan.
Ang supporter ni Magpale miingon nga ang iyang “manok” wa gyud sukad makahimo og salaod nga maisip nga pagbudhi sa katawhan.
Nagkatawa ko nga naminaw sa gisulti sa akong amigo nga gikan sa among lungsod sa San Remigio. Iya ko nga gipangutana kon unsa gyud diay ang tinuod. Buyno, kini gyud hinoon nga kaso ni Gwen, naggumikan man sa pagpalit sa Kapitolyo kaniadto, ubos sa iyang administrasyon, og P95 milyones nga yuta sa Tinaan, Naga nga ang dakong kabahin nasakop sa dagat.
Nindot gyud hinuon nga ang atong pilion nga opisyal mao ang mga tawo nga walay mansa sa mga kahiwian. Dugay na ko nga wala madestino sa Kapitolyo ug pareho ko nga wala pa gyud makahinabi personal nila ni Gwen ug Magpale.
Apan kon ako maoy botante, adto gyud ko mopili sa walay kandidato nga walay kaso nga giatubang, kay nganong irisgo man nato ang atong balaanong katungod sa pagpili?
Sa nabasa nako sa balita sa The Freeman, daghan man og nahimo si Magpale. Buyno, maayo tingali nga maghisgot sab ta og politika sa probinsya kay basin napul-an na mo dinhi sa siyudad.
* * *
Uy, lain pa’y ato, daghan gyud kaayo ang nalipay ug nagpasalamat ni Mayor Tomas Osmeña tungod sa pagtanyag niya og free Japanese language course diha sa Cebu City library.
Pagka karon, kapin na sa 6,000 ang nagpalista nga gusto silang moeskwela og Nihongo, kun pagsuwat ug pagsulti’g Hinapon. Giswerte ko nga naapil sa unang 70 sa first batch sa mga estudyante sa Nihongo speaking.
Kon magkita mi si Mayor Osmeña, ingnon nako siya “Duozo yoroshiko onegaishimasu.” Salamat sab sa among Japanese sensei nga guwapa, si Jazzy Sensei nga mihatag sa iyang libre nga serbisyo.