Usa ka polis ang gipusil patay diha sa ganghaan mismo sa Palasyo sa Hustisya sa Dakbayan sa Danao kagahapon sa buntag, walay nakapakgang sa mga mamumuno sa ilang krimen.
Hain naman diay ang direktiba sa Korte Suprema nga nagmandong kinahanglang pahugtan ang seguridad sa ilang mga sangang buhatan sa mga probinsya ug rehiyon nunot sa hitabo niadtong Enero 2013 sa Cebu Palace of Justice?
Tungod sa nahitabo, makapangutana ang publiko kun asa pa man kahang dapita luwas kay wala na gyuy kukahadlok kaning mga mamumuno paghimo og krimen.
Walay polis o gwardiya nga nakapakgang sa dihang giluthang si SPO1 Francis Allen Villamor sa mga mamumuno.
Si Villamor kanhi nadestino dinhi sa Provincial Intelligence Branch sa Cebu Provincial Police Office nga gilabay na didto sa Mindanao pipila ka tuig na ang nakalabay.
Padung siya motambong sa hearing sa kaso nga posibleng siya maoy usa sa mga arresting officers kaniadto dihang nadestino pa siya dinhi apan gipatay siya diha palang sa ganghaan.
Sagad man unta nga anang mga orasa pirme man dunay mga polis sa maong palasyo tungod sa mga nagkalainlaing mga kasong ipasaka diha sa korte, apan walay nakamatikod ug bisan nakabawos unta ngadto sa mga kriminal human ang pagpusil.
Kahinumdoman nga niadtong Enero 2013, usa ka 67-anyos nga Canadian ang namusil sa sud sa korte nga nakaingon sa kamatayon sa usa ka abogado ug usa ka doktor ug grabeng niangol sa usa ka babayeng piskal.
Hasta ang suspek namatay sab human nagpusil sa iyang kaugalingon sa dihang napusilan na siya sa mga mirespondeng polis. Tungod niadto, gimando sa Court Administrator nga si Midas Marquez pahugtan ang tanang mga edipisyo sa Palasyo sa Hustisya sa nasud.
Angay tingaling subling pahinumdoman ang maong mga buhatan sa pagpahugot sa ilang seguridad ilabi na nga anha magabot-abot ang mga gipangkiha ug mga nangiha nga posibleng mag-away ug mosangpot sa dugoon nga hitabo.