Walay bag-o sa listahan sa mga local officials nga nalambigit sa negosyo sa ilegal nga druga nga gipagawas ni Presidente Rodrigo Duterte sa niaging semana.
Nagtuo gayud ko nga anaay dakong bomba nga mobuto nga nakapakugang sa mga Sugboanon.
Apan ang anaa sa maong listahan nga mga politiko sa Sugbo nga giingong nalambigit sa druga mao gihapon kadtong naapil sa unang listahan ni Duterte. Hinuon adunay usa nga wala na naapil.
Ambot kun nalimpoyohan na ba kaha ang iyang ngalan.
Nagbandera gihapon ang ngalan ni Daanbantayan Mayor Vicente Loot sa maong listahan. Gikasab-an na usab ang kanhi police general sa presidente tungod kuno kay gasto lamang sa salapi sa gobiyerno ang pagtungha niya sa Philippine Military Academy apan nalambigit diay kuno kini sa druga. Starring usab sa maong listahan si San Fernando Vice Mayor Fralz Sabalones kinsa wala na karon igkita. Nahibalo na kita nga igsuon si Sabalones kang Franz Sabalones, ang giingong usa sa mga drug lord sa Sugbo nga mitahan sa otoridad apan gibuhian ug mipadayon na usab kuno sa negosyo sa druga.
Wala na karon nagpakita sa munisipyo sa lungsod si Fralz. Kini human nga mi-file og leave of absence. Nahadlok sigurong matiklo ug maapil sa lista sa mga kasamtangang opisyal sa lungsod ug mga kapitan sa barangay nga gipamatay sukad sa niagi nga tuig.
Ang labing swerte mao si kanhi mayor Michael Rama, kansang ngalan wala na sa listahan.
Kahinumdoman nga kaduha gayud nganli si Rama ni Duterte isip usa sa mga lokal nga opisyal sa nasud nga nalambigit sa druga. Hugtanon kini nga gihimakak ni Rama. Aw puwerte gayung lipaya sa kanhi mayor nga napapas na sa katapusan ang iyang ngalan gikan sa listahan.
Alang kaniya, nagpasabot kini nga nalimpiyohan na ang iyang ngalan gikan sa akusasyon.
Gani, nalipay siyang giisa ang iyang kamot ni Duterte atol sa PDP-Laban rally dinhi. Hinuon, aduna kunoy laing listahan ang gobiyerno sa mga narco politicians. Ug nagpaabot lamang kini og balidasyon aron mapagawas ngadto sa publiko. Kun kinsa na usab kining mga anaa sa bag-o nga listahan, ato lamang atangan.