Layo pa ang campaign period daghan nang mga nagkumbitay nga mga political propaganda sa mga local ug nasudnong mga kandidato sa umaabot nga midterm elections karong tuiga. Kaning mga political propaganda gipatik sa mga tarpaulins nga ginama sa plastic nga dugay madugta. Samtang nagpadung pa ang eleksyon duna pa kini mga gamit base sa katuyoan pagsab-it niini sa mga punoan sa mga kahoy, bungbong ug mga paril.
Apan human sa eleksyon, makadaog man o dili, kuli na kaayong balikan kini sa mga kandidato ug sa ilang mga supporters paghipos. Umaabot kining mga basura nga makabara sa atong mga kanal, sapa ug hangtud sa kadagatan.
Apan sa pagkatinuod bisan og wala pa ang eleksyon daghan nang mga tarpaulins dili lang sa mga ambisyosong mga politiko, mga plastic bags, plastic materials nga gipanggamit sa tawo. Dili tanang mga plastic nga basura ang gihipos og tarong kay ang uban adto na nahan-ok sa mga kasapaan ug sa dagat kay ang tawo iresponsable.
Diha palang sa dalan Colon ug Manalili, tagsa ka trak nga plastic nga basura ang mahabwa gikan sa mga kanal kun adlaw-adlawon pa kini og habwa.
Apan hilas kaayong paminawon ang mga opisyales sa kagamhanan kay kuno higpit ilang implimentasyon sa hustong pagbahig sa basura base sa Solid Waste Management Act.
Asa bay higpit? Kun higpit pa dili unta mabara ang mga kanal. Angay gyud unta nga unahon sa pagdukdok sa gobiyerno ang mga tawo mismo pinaagi sa higpit nga pagpanakop sa mga magpataka og labay sa basura ug seryusohon ang pagpahamtang og bug-at nga silot.
Sunod nga buhaton sa gobiyerno nga seryusohon ang pagtukod og tarong nga sanitary landfills, material recovery facilities, ug recycling plants aron mapuslan ang mga basurang plastic. Kung daghan ang masilotan, ug seryuso sab ang gobiyerno sa pagsunod sa mga probisyon sa balaod, tingali mahadlok na sab ug tinuoray nga madisiplina ang mga tawo pagbahig ug paghipos sa ilang mga basura.
Kay sa pagkakaron, kun buot tan-awon pulos lang bulatik ug kun duna man tusik-tusik ra ang gipanghimo sa mga LGUs sa paghipos sa basura. Sila maoy numero unong nilapas sa balaod ug dili ang mga tawo.