Liwas na sa Pasko apan gipaabot nga magpadayon ta pagpahimus sa kalibotanong pinaskohan nga baratong lana.
Hangtod sa akong pagsuwat ini, way timaan nga makabawi ang presyo sa mga produkto sa lana sa kataposang semana sa patigayon sa hapit na manamilit nga 2018.
May mga pangagpas gani nga magpadayon ang pagtibugsok sa presyo sa lana hangtod sa Bag-ong Tuig.
Ang presyo sa krudo ug gasolina karong semanaha mao ang kinaubsan sukad niadtong Enero 2016.
Kanus-a nitiurok ang presyo sa lana ngadto sa $30 matag baril tungod sa naghinobra nga suplay.
* * *
Nakaluwas sa Organization of Petroleum Exporting Countries (OPEC) dayong tapos sa 2016 mao ang pagkatukod sa gitawag nga OPEC+, ang mga nasud nga tinubdan sa lana apan di sakop sa OPEC nga gipangulohan sa Russia.
Malampuson kaayo ang pagpatuman sa ilang sabot sa paglaslas sa produksiyon sa lana nga wa lang nakabawi nisulbong pa gyud ang presyo sa iyang kinatas-an nga ang-ang karong tuiga niadtong Oktubre.
Apan nibalik paghagsa ang presyo sa lana og 40%. Maong nibalik pagdangop ang Saudi Arabia sa Russia ug sa ubang mga sakop sa OPEC+.
* * *
Susihunon pa kun makaduso ba pataas sa presyo sa lana ang bag-ong kauyonan sa OPEC ug OPEC+ sa paglaslas og 1.2 milyones ka baril matag adlaw sugod karong Enero 1, 2019.
Ang kauyonan molungtad og unom ka buwan ug gitakdang sublion karong Abril.
Padayon hinuon nga nahimong kontrabida sa kunsabo sa OPEC ug OPEC+, nga klarong gigawongan sa Saudi ug Russia, ang laing higanteng nasud nga way bilib nila—ang Estados Unidos.
* * *
Duha ang labing dagkong babag sa maniobra sa Saudi ug Russia pagpaburot pagbalik sa presyo sa lana:
• Una, ang determinadong paningkamot sa mga Amerikanhon sa pagdugang pa gyud sa ilang produksiyon ngadto sa 12.1 milyones ka baril matag adlaw sa bag-ong tuig; ug
• Ikaduha, ang kalisod sa pagkab-ot og kauyonan sa Estados Unidos ug China paghusay sa ilang trade war sa di pa ang deadline karong Marso 2.
Maong gipaabot nga magpabiling kuyawan ang OPEC ug OPEC+ sa unang tulo ka buwan sa bag-ong tuig kanus-a gipaabot nga magsaka-kanaog ang presyo tali sa $40 ug $50 matag baril o mas ubos pa.
* * *