“Daghan salamat mahal nga Inahan sa Dios, Birhen sa Regla” ingon niini ang kanunay nga gilitok nga pulong pasalamat sa mga deboto sa milagro nga gihatag ngadto kanila.
Usa niini ang bag-o lang nga miigo sa nasod ang bagyong Samuel diin natunong gyud sa pangilin sa Patrona ang gikatakda untang pag-igo sa bagyo sa Sugbo.
Sa bisperas pa lang daan nagsige na og ulan tibook adlaw apan pagka alas 4 sa hapon pagsugod na sa foot procession nihunong man ang ulan.
Natuman ang giingon sa Padre Kora nga ang Birhen sa Regla na ang bahala sa kahimtang sa panahon.
Sa adlaw na sa katumanan, unang giingon sa PAGASA nga posibleng moigo sa Sugbo ang bagyong Samuel.
Apan nihinay kini og natigayon gyud ang dakong kalihokan sa fiesta diin ang highlight mao ang pontifical mass ni Archbishop Jose Palma.
Sa misa gipasalamatan sa arsobispo ang mahal nga Birhen sa paghatag og proteksyon sa katawhan.
Pipila lang kini sa milagro nga nasaksihan ug nasinati sa katawhan gikan sa langitnong inahan.
Makita nato ang kahuot sa gawas og sa sulod sa simbahan sa mga tawo nga adunay mga panaad.
Ang uban gikan pa sa lagyong dapit balon ang mga pangaliya nga unta hatagan sa ilang mga gipangayo ug ang uban nagpasalamat sa grasya ug pabor nga nadawat.
Salamat mahal nga inahan sa padayon nga pag- ampo alang sa imong mga anak bisan sa dako nga mga pagkuwang.
Inahan sa kaaghop, Inahan nga Milagrosa Birhen sa Regla.