Ang buhok, importante nga bahin kini sa atong lawas, nga moprotehir sa ulo nga dili direkta madangdang sa grabeng temperatura, sa kainit o kabugnaw. Kon mawala ang buhok, mosinaw ug mabuni ang gitugkan sa mga buhok, nga maoy hinungdan sa dali ra o kanunay molabad ang ulo, labi nas tig-init.
Ang buhok, nakadugang sab kini sa kaangayan sa atong pamustora, nga naghatag sa dagway nga madanihon. Mao nga daghan ang nagmahal sa buhok, nga buhaton ang tanan, aron mohimsog kini. Apan dili sab kalikayan nga hasolon kita sa kamatuoran nga ang buhok moabot sab ang iyang kinutuban.
Ang buhok nga gubot, senyales kana nga kulang kini sa gikinahanglan nga sustansya, nga kon sudlayon manglarot.
Gawas ini, monipis ang buhok ug unya ini’g kaligo nato, nabara ang ‘drainage outlet’ sa kadaghang buhok nanglagas. Kon pasagdan ni, madugayan kita maopaw o kaha maihap na lang ang lugas sa buhok.
Usa sa daling kapasanginlan nato niining kahimtanga, mao kadtong kanunay nagpakemo o nagtumar og grabeng antibiotic nga tambal sa kasingkasing. Permi nabantang sa kemikal, solar radiation, ‘hormonal imbalance’ ug uban pa. Busa maayo nga aduna kitay ideya sa natural nga remedyo ini, aron dili kita madalidali nga mabiktima sa pagkaopaw, gawas kon angayan ta ini’ng tan-awon.
Tingali nakagamit kana’g lainlaing produkto nga pahimsog sa buhok nga giproseso sa kemikal nga sagad maka-alergy o mamuti ang mga buhok, nga usa sab nis hinungdan sa pagpanlagas sa atong buhok. Niini, sulayan sab ang ubang paagi, nga angay buhaton sa pagsalbar niining problemaha.
* Mogamit o mokosumo og puro’ng natural o herbal nga suplemento, alang sa pagpanurok ug pagtubo sa bag-ong buhok. Siguroha sab kon moepekto kini kanimo.