Oktubre 7, 2018: Ikakawhaa’g-siyam nga
Domingo sulod sa tuig
MGA PAGBASA: Is. 53;10-11/Sal. 33/Heb. 4;14-16/Mk. 10;35-43
Mao nga way rason nga kita maghinambog. Ang tanan nga atong nakab-ot ning kalibutan ato ra gyud biyaan. Bisan gani ang atong mga ambisyon paliron ra sa hangin sa kapanahonan. Kay mosugot kita o sa dili dunay molabaw kanato ug mahimong mas ngilngig pa kay kanato. Ang tinud-anay nga pagkapangulo nagasukad sa mapaubsanong pangalagad. Ang mapaubsanong pangalagad nagasukad sa atong kaamgo nga bisan gani ang atong magtutudlo nga si Hesu Kristo wala moanhi aron alagaran kondili aron molagad. Sa matag higayon nga kita suguon isipa kini nga kahigayonan sa pagpakita nga nalipay kita nga nakahimo og maayo alang sa uban. Kaanindot unta kon kini mao ang atong bugtong ambisyon samtang nagginhawa pa kita ning kalibutang lumalabay lamang.