Ang atong paghikatulog dungan ang pagdamgo maoy timailhan sa atong mga pangindahay ug mga tinguha sa kinabuhi. Ang uban nila atong gidamgo kuyog ang atong mga mahal sa kinabuhi apan ang uban nila atong kinaugalingon lamang. Sakit palandungon kon ikaw bana unya sa dihang tupad mo ang imong pinalanggang asawa magsinggit sa ngalan sa imong kumpare daw sa iyang gipangindahay nga ikahalog niya kini. Apan bisan pa niini imo siyang gipaminaw uban ang paghigugma. Ingon ini usab ang Dios bisan pa man kon napuno sa laing mga ngalan ug priorities ang atong baba ug hunahuna apan kita gipaminaw niya bisan pa man kon ang atong mga pag-ampo kutob lamang sa kinaugalingong katuyoan. Ingon ini ang gugma di ka magsapayan kon nahimong daw manhid ang atong gihigugma. Gihigugma nimo ang tawo bisan sakit sa imong buot tungod kay nahimo kang option niya. Apan diha sa paghigugma anaa ang kalapad sa dughan ug andam kang kumoton kini sa mga kamot nga tampalasan.