Mibiya o biya-biya lang? Pangutana kini sa mga tigpaniid sa politika tungod sa gibuhat sa pipila ka politiko sama nilang Mayor Tomas Osmeña ug Bise Gobernador Agnes Magpale.
Apan dili ko motuo nga hingpit nga mibiya si Tomas sa Liberal Party. Kahibudngan kaayo nga sa iya nang pag-file gipahibalo niya nga ang partido nga sandigan sa Bando Osmeña Pundok Kauswagan (BOPK) mao ang Laban ng Demokratikong Pilipino kun LDP.
Adunay nagsulti kanako nga ang paggamit ni Tomas ug sa BOPK sa ngalan sa LDP usa lamang ka accommodation ug ang tinuod nga partido niini mao ang Liberal Party.
Sumala pa sa usa ka kasaligang tinubdan, adunay kasabutan ang kampo ni Tomas ug ang BOPK tali sa Liberal Party nga adto lang una siya mopasilong sa LDP aron pagsiguro nga magpabilin ang mga gaway sa Liberal Party sa 2019 nga eleksiyon.
Sila si Senador Kiko Pangilinan, Bam Aquino, Mar Roxas ug uban pang mga dagkong tawo sa Liberal Party nahadlok nga hingpit mapapas ang ilang partido human sa 2019 nga eleksiyon kun dili sila modangop sa estratehiya nga pagbiya kunohay sa maong partido.
Timan-i ninyo kini, sukad pa kaniadto nga lunod-patay sa Liberal Party ang BOPK hinungdan nga dili kini makabiya sa maong partido.
Human sa 2016 nga presidential elections, si Tomas nagpa-interview nga dili si Pres. Rody Duterte iyang presidente, kondili si Mar Roxas.
Adunay daghang okasyon nga mianhi si Bise Presidente Leni Robredo sa Sugbo ug iya kining gi-abi-abi sa iyang opisina.
Mao usab si Bise Gobernador Magpale. Uban nilang Gigi Sanchez nga anak ni anhing bise gobernador Greg Sanchez ug kanhi mayor Antonio Yapha, nangadto sa Davao ug nagpa-picture kang presidential daughter Davao City Mayor Sara Duterte-Carpio.
Sa post sa Facebook, gipatuo nila nga ang Hugpong Pagbabago na ang kampo ni Magpale.
Usa ka dakong ilad! Gibalikbalik gyud ni Inday Sara nga dili siya manghilabot sa lokal nga politika.
Busa si Magpale usa ba gihapon ka dakong tawo sa Liberal Party sa Sugbo?
Tungod kay gikalagotan na sa mga tawo ang Liberal Party nga gitawag nila og Yellow o Dilawan, gipatuo nilang Tomas ug Magpale nga wala na sila niining partidoha.
Sumala pa sa mga eksperto sa politika, kining mga politikong gitawag nila og Dilawan nailhan sa kinaraan nga pamolitika, korupsiyon, pagpalipang sa ilegal nga drugas pinaagi sa narco-politics, incompetence ug pagpalisod sa kinabuhi ug kawalay malasakit alang sa mga Pilipino.
Atras lang una sila karon, apan nagtuo ang mga tigpaniid sa politika nga mosulpot ra gihapon og balik ang mga sakop sa Liberal Party.
Apan kining eleksiyona sukaran sa popularidad ni Pres. Duterte.
Kon mapapas ang Dilawan o Liberal Party, tungod na sa pag-aprobar sa mga tawo sa liderato ni Digong.