Mibukal na ang kawa sa politika sa siyudad sa Sugbo karon nga naklaro na kinsa gyud ang magsakbang sa 2019 nga piniliay.
Ang PDP Laban nga partido ni Pres. Rodrigo Duterte mibuhos sa suporta ngadto kang Edgar Labella pagka-mayor.
Makita nato nga gikonsiderar sa PDP Laban ang taas nga kasinatian sa panggobiyerno ni Labella, gikan sa iyang pagka-director sa Ombudsman-Visayas hangtod nahimong konsehal ug karon nagserbisyo isip bise mayor.
Ang iyang kaligdong ug walay bahid sa korapsiyon ug walay link sa ilegal nga drugas ang nakita ni Pres. Duterte kang Labella.
Ang BOPK nga orihinal nga link sa Liberal Party dinhi sa Sugbo sukad pa kaniadto mituboy gihapon kang Mayor Tomas Osmeña.
Ang estorya nga mobalhin sila sa Laban ng Demokratikong Pilipino gikataw-an sa mga tigpaniid sa politika kay sumala pa nila, kanang kang Tomas “association by convenience” lang.
Abi kay bun-og sa mga pagsaway sa mga tawo ang Liberal Party, motago na sila sa PDP?
Sa ato pa, magkaatbang na gyud ni Tomas iyang tinun-an sa politika.
Kay kini raba si Labella dugay na kaayo kini nga angayan mosaka sa taas-taas nga posisyon, apan mapugngan kay lagi si Tomas man ang magbuot.
Sama ra usab kang Konsehal Junjun Osmeña nga dugay na untang mosunod sa tunob sa iyang amahan nga si kanhi Bise Mayor Jingjing Osmeña, apan wala kaatraka kay adunay uyoan nga mayor nga nagpugongpugong.
Pagpahibalo nga si Konsehal Mary Ann delos Santos ang tandem ni Tomas, nakakomentaryo akong higalang komentarista nga “marriage by convenience” ra gyud ning ilang Tomas ug Mary Ann.
Nakahinumdom pa tingali ang mga Sugboanon nga grabe ang away nilang Tomas ug Mary Ann kaniadto sa dihang nagkaatbang sila sa politika.
Apan ang nahibudngan sa mga taga-south district nganong dili man si Konsehal Dave Tumulak ang gi-tandem ni Tomas?
Si Dave ug ang iyang mga dumadapig naglaum nga siyay i-bise mayor ni Tomas tungod sa iyang taas nga kasinatian sa politika ug panerbisyo publiko.
Apan nganong naka-ako man si Tomas sa pagtalikod sa loyal niyang sundalo nga si Dave?
Aw, ang hunahuna sa mayor dili man ang pagpadagan kinsay angayan. Tingale ang gi-apas niya kinsay maka-deliver og botos sa 2019.
Nagtuo tingale si Tomas nga ma-imbudo ngadto kaniya ang botos sa north district kay taga-norte man si Mary Ann.
Apan nganong iya man gi-itsa puwera ang baga nga suporta ni Dave sa south district?
Gikan sa Mambaling paingon ngadto sa Pardo adunay kaligotgot sa mayor tungod sa namugnang trapik tungod sa iyang pagpugos nianang Mambaling underpass, pun-an pa sa kalagot sa mga taga-Basak San Nicolas paingon sa Quiot ug Pardo tungod sa iyang pagbugalbugal kang Mike Rama, unya iyang gi-itsa puwera si Dave Tumulak nga baga og suporta nianang mga lugara?
Wala maayo pagkuwenta.