Maoy naandam sa uban, ilabi na sa tingpanihapon, nga ini’g human og kaon, modayon og plastar nga maghigda samtang nag-relaks nga nagtan-aw sa TV o nagbidyu sa kinaham nga salida sa sine o kaha sa seryal sa mga kaugmaran.
Kini nga mao nga senaryo, dili nato mabasol ang hintungdan nga wala masayod kon unsa kini ka kuyaw o teribleng kinaiya nga mosangpot sa grabeng kadaut sa panglawas.
Busa gikinahanglan gayud nga atong sayron kon unsa ang dili buhaton kada ini’g human og kaon, ilabi na sa paniudto ug sa panihapon.
* Ang pagpanigarilyo – daghan ang nasayud nga makadaut ang sigarilyo sa panglawas apan gibalewala lang ni sa uban, hangtud nasagmuyo nga nahimong prinsipal sa grabeng pagkasakit ini.
Mosamot nga kon manigarilyo ini’g human og kaon, ang usa ka yupyop katumbas sa 10 ka buok nga sigarilyo.
Sa ato pa, paspas kini makadaut sa lawas, diin ang sigarilyo nagbaton og 4,000 toksik nga sagol, nga mapundo sa baga, labi na ang ‘nicotine’ maoy mohipos o mosuyop sa sobrang oxygen nga esenyal sa pagtunaw sa kinaon.
Kon di gyud kapugngan ang manigarilyo, palabya una ang pipila ka oras ini’g human og kaon, aron dili ka dali maantimano sa negatibo nga epekto niini.
* Ang pagkaon og prutas – kadaghanan mao gyud ni ang gibuhat isip panapos o pang-desserts ang mga prutas ug ubang panam-is, ini’g human sa tingkaon.
Kon kinahanglan mokaon og prutas, unahon ni sa pagkaon mga 1-2 ka oras sa di pa ang paniudto o panihapon.
Kay kon kaonon ni dayon human sa tingkaon, magrambol ang ‘digestive system’ mo nga di ka kahilisan, kay lahi ang enzymes sa preskong prutas ug sa linuto, mao nga mag-alburoto ang tiyan mo.
Nga ang uban ini, mosaka sa kutokuto ang lactic acid nga kabuhion ug kasukaon.