Kuyaw nga malili-an ang bangag sa amnesty sa mga sakop sa Magdalo karon nga ang Department of Justice mismo ang nagpahibalo nga gipaubos sa pagtuon ang prebilihiyong gihatag sa gobiyerno ni Senador Antonio Trillanes IV ug kaubanan niining mga rebeldeng militar.
Apan wala na ko mahibulong niini. Niadtong nag-ung-ong ang balita nga posibleng lilion ang amnesty ni Trillanes, gikuyawan na ko daan nga basin og maapil ang amnesty sa iyang mga kauban nga Magdalo.
Lain nako nga gikuyawan mao ang “revealing” nga pamahayag ni Justice Secretary Meinardo Guevarra nga ang Armadong Kusog sa Nasud kun AFP ang nagtuon sa amnesty sa mga sakop sa Magdalo.
Nakaingon ko nga “revealing” tungod kay ang pasiatab sa mga sakop sa Magdalo aduna silay mga “sympathizer” sulod sa AFP. Ug kun ang AFP mismo ang nagtuon sa ilang amnesty nga moresulta sa pagduot sa mga sakop sa Magdalo, mensahe kini nga wala diay mga sundalo nga misakay sa kalihukan sa Magdalo.
Tingale adunay pipila nga misimpatiya. Ug kining mga misimpatiya adunay duha ka klase - misimpatiya sa kawsa sa Magdalo apan magpabiling nagpakahilom kay supak sa palisiya sa AFP ug misimpatiya tungod kay dili nila suportado ang war on corruption ni Pres. Duterte, sama niadtong gipangtaktak kay nangurakot sa pundo sa kasundalohan.
Apan kadaghanan sa mga sundalo karon wala ganahi sa gihimo sa mga Magdalo. Naglagot sila kang Trillanes ug sa mga Magdalo nga gigamit ang military adventurism aron iduso nila ilang politikanhong agenda.
Busa kining Magdalo nga grupo natagak na isip usa ka grupong angay kahadlokan sa planong pagpalagpot ni Duterte pinaagi sa gitawag nila og “Red October.”
Ang nahabilin na lang karon mao ang mga rebeldeng komunista nga nagplano og sunod-sunod ug dungan nga pagpangatake sa tuyo nga mapalagpot ang administrasyong Duterte ug ang oposisyon kang kansang tahas mao ang pagpakatap og fake news ug misinformation pagpintal og bati nga estorya sa administrasyon.
Dinhi sa Sugbo, dugay na kaayo kining estorya nga adunay pipila ka lokal nga opisyal nga apil sa laraw pagpalagpot sa presidente.
Niadtong niaging tuig, si Senador Kiko Pangilinan mianhi sa Sugbo ug nakig-meeting sa pipila ka mayor. Pipila sa mga mayor nga mitambong na-shock sa mga gipangsulti ni Kiko nga ang “linyada” paingon sa pagpakusog sa oposisyon pagpakigbatok sa administrasyon. Ang mensahe mao ang hinayhinay nga pagdaut sa presidente.
Apil ba niini si Mayor Tomas Osmeña?
Aw, kun basahon nimo ang baba ni Pres. Duterte sa dihang miingon siyang iyang tamparoson ang mayor sa siyudad, para nako mensahe kini nga dili angayang masayop ang mayor pag-apil-apil sa mga tinguha pagpalagpot sa presidente.
Ang Sugbo maoy nahabilin nga katapusang teritoryo sa Liberal Party. Wala nay laing lugar nga gigunitan og LP kay ang Iloilo dugay ra nga napatag human mokagiw si Mayor Jed Mabilog, ang gihinganlan sa presidente nga narco-mayor.
Sa akong pagtuo, gibantayan karon ang Siyudad sa Sugbo ning mga estorya kalabot sa Red October.
Pagbantay sad kamo.