Makakutaw sa utok. Murag crossword puzzle ang sagad nahitabo karon sa mga prisohan ning atong siyudad, nagpatik og daghang gagmay’ng kuwadrong blangko, nagpaabot sa unsay tukmang pulong isulat nga makatubag sa pangutana: ‘nganong makasulod gihapon ang gidiling drugas sa bilanggoan nga ubay-ubay mang guwardiya ang nagbantay niining lugara?
Dili kaha kakunsabo ang warden ug jailguards sa nagnegosyo’g shabu sa sulod ug gawas?’
Pipila lamang kini ka pangagpas base sa mga panghitabo nga kutob ra intawon sa pagduda kon may patyon sa mga riding-in- tandem sanglit magsul-ob man gyud og maskara ang tanang sindikato nga miyembro niining negosyoha aron dili mailhan ang tinuoray nilang hitsura ug magpabiling tigmo sa katawhan ang hustong tubag sa daotan nilang binuhatan.
May nangutana. ‘Kon ang tumong sa nagpatay nila mao ang paghipos sa mga sagbot sa katilingban aron kapanalipdan ang kaugmaon ug kinabuhi sa mga inosente, sigurado ka ba nga sila mahalangit?
Ang Ginoo ra gyuy nahibawo sa tanan. Gani, si Dimas, usa ka banggiitang tulisan nga gilansang sa Krus tupad ni Hesukristo, human nakaamgo sa dakong kasal-anan nga nabuhat, mihangyo: “Ginoo, kon atua Ka na sa langit, hinumdomi intawon ko.” Ug dihadiha, gitubag ang tulisang kriminal: “Karon, karon dayon, mahiuban ka Kanako sa paraiso.”
Asawa sa usa ka pastor sa laing tinuohan misukna nako: “Ikaw, Dong, mi-serve man og simbahan, sigurado na gyud kang mahalangit?”
Haskang dalia na kong nakatubag: “Ang Ginoo ra gyuy makahukom, Day! Kay lisod sudlon ang Langit. Hagip-ot ug piot kaayo ang agianan nga sung-on una ka maabot sa paraiso.”
“Ayaw pag-ingon nga lisod, Dong. Kay, nia, oh,” gibasahan ko niya’g verses nga nagpunting, tanang maniguro nga makasulod sa langit, makasulod gyud. “Busa, ayaw pagduhaduha. Ingna nga segurado gyud ka!”
Dali ra kong nakasabot sa mensahe nga gustong ipadangat ngari nako. Kinahanglang wad-on ang pagduda nga mahalangit. Kay kini nagpaila lang nga magpatintal pa gyud diay ko sa pagpakasala.
Samtang kon moingon kong sigurado, aw, paneguroon gyod nako nga di na magpakasala forever aron pag-abot sa adlaw nga i-recall na ko sa Ginoo, sigurado gayod nga Iya kong padayonon sa Langit.