Mas dangog pa kay sa isdang halwan si Peter Go Lim, ang giingong naa sa listahan sa mga druglord nga gigunitan ni Pres. Rodrigo Roa Duterte.
Ambot, pipila na kaha ka higayon nga si Lim nakigtagbo ni Duterte didto sa Malakanyang ug Davao aron kombinsihon ang pangulo nga wa gyud siya magnegosyog shabu.
Hangtod karon gipangita pa siya sa kapolisan human malutsig warrant of arrest tungod sa kasong illegal drugs nga gipasaka sa Criminal Investigation and Detection Group (CIDG) batok niya.
Usa si Lim sa iyang gibaharan. Ug dili moilag suod nga higala ang pangulo kon nahilambigit sa illegal drugas business.
Daghang oposisyonista ang pirmeng misaway sa kapoiisan nga maayo lang kuno sila motirag mga gagmay. Perog mga dagko, ay, sus, naglisod! Wa gyuy ikapanghambog!
Kining maong komentaryo nagagikan sa mga tawong buta. Wala makakita sa tinuoray’ng gibuhat ni Duterte ug sa kapolisan. Danglog lang gyud ang mga dagko, mao nga makaipsot bisag nahikapan na sa mga kamot sa balaod.
Niadtong nagkainit ang mga kaso sa drugas ni Peter Lim, gilimpiyo kini tanan ni kanhi Secretary sa Department of Justice Vitaliano Aguirre, kay matud pa niya wala kunoy lig-ong basehan ang mga sumbong ug ebidensiya nga gipresentar.
Busa, naabsuwelto si Lim. Apan sa iyang pagkaabswelto, napalagpot sab dayon si Aguirre sa iyang puwesto. Tiaw bay, si Lim naa sa listahan, unya gustong papason ni Aguirre?
Karon, pwerting pinangitaay sa kapolisan ni Lim human kalutsi og warrant of arrest. Usab, miisyu na ang balaod og Hold Departure Order aron dili makagawas sa nasod si Lim.
Dili kaha ulahi na ang tanan? Gani, matod pa sa huhungihong, ang pamilya ni Lim, taudtaod nang atoa sa gawas. Unya, siya pa kaha? Timan-i! Si Lim morag tanggulilong. Mokalit lag tungha, unya mokalit lang pud kawala.
Hold Departure Order? Sa kaadunahan ug kaimpluwensiyado ni Lim sayon ra kaayo ning lutsan. Busa, nia pa kaha siya sa Pilipinas?