Agosto 5, 2018: Solemnidad ni
San Juan Maria Vianney
Mga Pagbasa: Ex. 16;2-4,12-15/Sal. 78
/Ef. 4;17, 20-24/Jn. 6;24-35
Pinaagi sa initiative sa Commission on the Laity dinhi sa Artsidyosesis ang Agosto 5 nahimong adlaw sa pasalamat ngadto sa kaparian. Ingon ini usab ang Eyukaristiya. Ang Eyukaristiya nagpasabot man og pasalamat nga tungod niini kinahanglang mopaambit kita sa bisan unsa nga atong nadawat. Kini tungod kay ang pagpasalamat nagkahulogan man og kamanggihatagon. Sa akong pagpamalandong niini, kini nakadasig nako sa pagpaningkamot nga himuon ang akong kinabuhi ingon nga pasalamat ug diha sa maong pagpasalamat akong ihatag ang tanan nga maayo aron malipay ang uban. Ihatag ang kaayohan aron ang uban unta magpasalamat usab. Kay sa panahon nga sila magmapasalamaton mamahimo pud silang manggihatagon. Sama ni San Juan Maria Vianney nga diha sa iyang pagpasalamat nahimo siyang manggihatagon sa iyang kaugalingong panahon alang kanila nga nagkinahanglan sa iyang pagmaymay diha sa kumpisalan. San Juan Maria i- ampo mo kaming imong mga anak!