Gidakop na kadtong tawo nga bungoton nga maoy midagmal ug mihagbong ngadto sa lapokon ug hugaw kaayong sapa, sa usa ka menor de-edad nga giingong nangawat og manok sa ilang dapit.
Ang kapolisan midakop sa maong tawo tungod kay daghan sa mga nakakita sa video nga nag-viral sa social media, nakasaway pag-ayo sa iyang gihimo, ilabi na nga gihulagway nga may deperensya sa pangisip ang maong batan-on.
Dili gyud hinoon kalikayan nga bation ka og kasuko sa mga kawatan nga mobiktima kanimo, ug mokuha sa imong mga butang. Kaduha na gisaka og kawatan ang akong balay.
Ang unang higayon, nahitabo atol sa gabii sa Sinulog grand parade mga pila ka tuig na ang milabay, kay gibiyaan nga wala gyuy tawo ang among balay.
Gilungkab ang akong opisina sa balay, ug ang gitipigan nako nga 20 ka tag P500, gihurot gyud pagsakiyo.
Ang ikaduha, nahitabo kaniadtong kaadlawon sa miaging Mayo 20.
Gisaka gihapon ang akong balay, ug didto mideritso ang kawatan sa binuksan ra nga kuwarto sa akong bata sa second floor.
Nakakuha gyud ang kawatan sa mga baligyang relo ug cellphone sa akong bata.
Kini maoy rason nga naglungotlungot gyud ko kay insulto kaayo para kanako nga gisaka ang akong balay.
Sa ikaduha nga higayon, nangatulog mi, ambot giunsa pagsulod sa kawatan.
Kadtong gihimo sa maong tawo nga bungoton, dala ra gyud sa iyang kasuko.
Buyno, kay nakahimo man gyud kaha siya og salaod, angay niya kini nga tubagon.
Pero kadtong akong kahimtang nga gisulod na sa kawatan sa balay, sigurado ko nga abswelto bisan pa og usbon nako ang birthday sa maong tawo ngadto na sa Nobiyembre 1.
* * *
Giangkon na ni Kasambagan Barangay Captain Franklin Ong nga nanghatag siya og laptop sa mga kauban niyang kapitan nga alyado sa Bando Osmeña Pundok Kauswagan.
Para kanako, walay problema. Dili na maayong padak-on pa kining maong isyu.
Sama nga dili usab maayong padak-on kadtong isyu nga si Mabolo Barangay Captain Niña Mabatid giingong manghatag unta og tag P1 million.
Ang pinalitay og botos karon, “acceptable” na sa kadaghanan mao nga dili na angay’ng himoong isyu nga adunay kandidato nga namalit og botos sa mga tawo nga mobotar kanila.
Sila si Kapitan Ong ug si Mabatid pareho nga nagpapili pagka presidente sa Association of Barangay Councils (ABC).
Iya-iya sila og mga ideya kon unsaon nga modaog, ug kon apil man ang pagpamalit og botos, angay lang sila nga pasagdan.