Unang adlaw karon sa tuig-tingtunga sa mga pampublikong eskwelahan. Laing tikang alang sa pagkab-ot sa tingusbawan pinaagi sa paghupot og kinaadman. Dali ra kaayo ang pagligid sa panahon nga daw mora’g kagahapon lang ang closing exercises, apan karon balik sa reyalidad ang pagmata sayo sa buntag aron dili ma-late sa klase.
Ang uban wala pa naka get-over sa taas nga bakasyon ug gustong mopakapin pa pinaagi sa pagpalta sa unang adlaw sa klase. Apan wala na’y katarungan sanglit andam na ang tanan, human sa usa ka semana nga Brigada Eskwela, nalimpyohan na ang mga tunghaan. Human sa flag raising ceremony, mosulod dayon sa mga classrooms ug sugod dayon sa klase.
Dili pareho kaniadto nga mag-general cleaning pa una makasugod sa leksyon.
Mao gyud kini ang ideal, o standard nga gipatuman sa Department of Education apan layo kaayo sa kamatuoran, tungod kay daghan pa kaayo nga mga tunghaan sa nasud nga dako pa kaayo ang kakulangan. Sama sa mga classroom, mga bangko ug uban pa nga gikinahanglan sa mga tinun-an. Hinoon, adunay mga dapit nga hapsay na ang tanan tungod kay gihatagan og hugot nga suporta ang DepEd sa lokal nga kagamhanan.
Apan dunay mga eskwelahan sa kalungsoran nga ingon napasagdan ug nakalimtan na kay kuwang sa suporta ang ilang LGU.
Duna gihapo’y magklase sa ubos sa landong sa kahoy, covered court ug uban pa nga mga temporaryo nga lawak aron lang magamit sa mga tinun-an.
Bisan sa sakit nga kamatuoran sa kalbaryo nga giagian sa mga kabus nga kabataan, apan naningkamot gihapon aron makatapos sa pagtungha ug makab-ot ang gitinguhang tingusbawan nga maoy makapahaw-as sa kalisdanan nga nahiagoman.
Mas nindot tagamtamon ang kalampusan luyo sa kalisdanan. Mahitabo lang kini kon mopadayon sa tikang sa mga pangandoy nga mahatagan og katumanan.