Pamenos sa bugasbugas ug pahamison ang kutis – ang ‘oxalic acid’ ug vitamin-A sa eba mopamenos sa mga bugas-bugas ug mopahamis sa nagdagtum nga panit ug mosanta sab kini sa implamasyon.
Ang vitamin-C maoy responsable niini, hasta sa pagmenos sa mga tumtom nga pabiling gipahugot ang panit kay gipagana sa eba ang prodaksyon sa ‘collagen’.
Ang pagpawagtang sa bugas-bugas, limpyohan lang ang nawong, unya butangan sa pinigsat nga bunga sa eba, isip nga ‘face mask’ nga pasagdan kini sulod sa 30 minutos, inighuman hilam-osan og init-init nga tubig.
Pag-alibyo sa subra katambok – maisip na kini nga sakit ang subra katambok ug ang eba usa kini sa gigamit sa India sa ilang panambal para sa pag-alibyo niining isyu sa panglawas, partikular sa ‘obesity’.
Wala lang kaayo ni maalinggati nga anaa ra sa tugkaran, ang natural nga pang-alibyo, nga tunawon, o sunogon ang natigum nga subrang mga tambok, kay toksik na kini nga makasakit sa lawas.
Kinahanglan lang ang regular nga pagkonsumo sa prutas nga eba.
Pahimangno – ang prutas nga eba bisan og nagbaton kini og daghang nutrens, mas naglabi niini ang hiyas sa kaaslom gumikan sa ‘oxalic acid’. Sa katibuk-an, usa kini ka potensyal nga prutas alang sa kahimsog sa panglawas kay nagbaton ni og gahum sa natural nga medisina.
Dili lang kaayo magpalabi niini sa pagkonsumo, igo lang iapil sa imong mga diyeta, ug iagad lang sa panginahanglan sa kondisyon sa lawas kay ang tanan kon pasubrahan, makadaot gyud. Kon maghinubra ka sab pagkonsumo sa eba, mosangpot sab kini og sakit sa atong kidney.