* Ang tipo sa dugo-AB — Sa mga babaye nga adunay tipo niini, kalagmitan taas og risgo sa ‘ovarian cancer’, hasta sa ‘preeclampsia’ nga motaas ang presyur sa dugo, sa panahon nga nagmabdos. Sagad sab niini nga tipoha, huyang ug tandogonon kaayo, nga taas ang risgo sa atake sa kasingkasing. Problemado sab ang pagtunaw sa kinaon (digestions) sama sa sakit nga ‘gastrititis’.
Sa laing bahin, ang tipo-AB — Maayo sab modala kon hamokon sa mga problema, dili dali malukapa kay lig-on og paglaum sa kinabuhi kay abunda ug taas ang lebel niini sa ‘cortisol’, yano ra madaog ang bisan unsa pa kagrabe sa stress. Sagad sab nila, mga himsog ang ilang kahimtang sa panan-aw sa mata, maingon man sa positibong panan-aw nila sa kinabuhi.
* Ang tipo sa dugo-O — Sa mga nagbaton niining tipoha, taas sab ang risgo sa ulcers (helicobacter pylori), nga mas labing bantang sa peligro sa sakit nga kolera. Ang sa mga lalaki, dali motambok nga nanubra sa timbang (obesity). Sa mga babaye kalagmitan maglisud sa pagpanganak.
Apan kini nga tipoha, sagad sab nila malaumon ug taas og pasensya, mga lig-on og kasingkasing. Maayo modala sa mga problema ug madiskarte nga dili basta padaog sa stress. Mosukol bisan og kaugtason na sa kapait sa bugno ning kinabuhia, mapawot man, nagpabilin nga malaumon.
Konklusyon : Mga indikasyon lang kini sa mga tipo sa dugo, nga mas bentaha kaayo nga makahibalo kita niini, kay makita niini ug mabatyagan ang sitwasyon, nga kon unsa’y atong kahuyangon, ato kining maaksiyonan nga sa paagi, aron pagbalanse sa kaayohan, nga kon ang uban makahimo, nganong kita dili man, di ba?
Gihatagan kita’g ideya, aron sa paghimo og tukma nga desisyon, pag-alkontra sa mga negatibo nga kahimtang sa lawas, aron hingpit makab-ot ang kahimsog.