Gipaabot nga protesta, inay pagsaulog, ang buhaton sa mga mamumuo atol sa pagtimaan sa Labor Day karong Mayo 1 sunod semana. Ang nagkadaiyang kahugpongan sa mga trabahante mipasidaan nga molusad sila og protesta atol sa maong adlaw.
Usa sa mga mibahad pagpahigayon og lapad nga protesta mao ang Nagkaisa nga gilangkuban sa nag-unang mga labor organizations sa nasud, apil na ang labing dakong kahugpongan sa mga mamumuo nga mao ang Associated Labor Unions-Trade Union Congress of the Philippines (ALU-TUCP).
Nag-unang reklamo sa mga trabahante mao ang wala pagtuman ni Presidente Rodrigo Duterte sa iyang saad atol sa kampanya nga hunongon na ang Endo, o ang kontraktwalisasyon sa pagpanrabaho aron sa ingon mahatagan og kasigurohan ang mga anak sa kabus.
Wala mahimuot ang mga labor organizations sa nasud sa pagdumili ni Duterte pagpirma sa Executive Order nga magdili na sa hingpit sa contractualization. Hinuon gipasa sa presidente ang obligasyon ngadto sa kongreso.
Sayod ang kadaghanan nga didto sa kongreso nagkalainlain ang interes sa mga kongresista. Daghan nila dunay giprotehian nga mga kapitalista nga maoy nagsilbe nilang mga bangkero panahon sa eleksiyon. Ug kini sab maoy akong tan-aw nga hinungdan nganong nagdumili si Duterte pagpirma sa executive order.
Lisud alang sa mga politiko ang pagsungag sa gamhanang mga kapitalista, labi pa kon ikaw, o ba kaha ang mga miyembro sa imong pamilya nagplano pa nga magpabilin sa politika.
Sa kaso ni Duterte, dili na siya makapapili pag-usab ubos sa atong Constitution. Apan dunay mga miyembro sa iyang pamilya nga posibleng mokandidato.
Usa nila mao si Davao City Mayor Sara Duterte, kinsa gitupo na sa pagkakaron nga posibleng running mate ni kanhi senador Bongbong Marcos sa sunod presidential elections. Wala pa gani siguro nga mao gyud ni ang mokandidato pagka presidente.
Dili sab imposible nga karong eleksiyon sunod tuig mopapili ni pagka senador agi og pangandam sa mas taas nga posisyon, labi pa nga usa siya sa mga nag-una sa pre-election survey nga gihimo sa Social Weather Station.
Kon masuko ang mga kapitalista, unsaon naman lang ang pundo sa ilang kampanya?