Ang atong lindog nga sagunson natong gipagawas sa miaging duha na ka Domingo, naghisgot sa mga maayong kinaiya sa pamilyang Sugboanon, ilabi na sa mga batan-on nga morespeto gyud sa ilang mga ginikanan ug sa mga labaw kanila og edad.
Tam-is kaayo handumon ang batasan kaniadto sa mga batan-on nga mangayo gyud og katahuran sa ilang mga ginikanan inig-abot na sa oracion, ug dayon magdungan sila pagpangadye sa Angelus, sa dili pa manihapon.
Nasubo kaayo ko nga maghunahuna nga karong panahona wala na kining nindot kaayong kinaiya diha sa kadaghanang mga pamilya. Tungod sa mga modernong electronics gadgets, inanay’ng gibanlas ang mga maayong pamatasan nga angay unta nga sagupon sa usa ka pamilya.
Karong panahona, hapit tanang adlaw sa semana, ang mga sakop sa pamilya dili na magkadungan sa pagkaon kay ang mga ginikanan tua sa tagsa-tagsa nila ka trabaho, ug ang ilang mga anak tua sab sa tunghaan.
Ang bugtong panahon nga magkadungan unta sa pagpangaon ang pamilya, mao na lang gyud ang panihapon. Apan subo kaayo nga palandungon kay ang amahan usahay dili na modungan pagpangaon sa iyang pamilya kay nagkuri-kuri pa sa iyang laptop. Ang inahan “busy” usab sa iyang Ipad, samtang ang ilang mga anak nalingaw kaayo nga nagpindut-pindot sa ilang mga cellphones.
Masabot kaayo nga nagkauban man tuod sila sulod sa usa ka panimalay, apan naglatagaw ang ilang mga hunahuna, ug ang ilang mga pagtagad tua na hinoon nila igahin sa ubang mga tawo.
Hinuktuki kuno pag-ayo. Kon ipadayon nato kining mao nga kinaiya, mapalig-on kaha nato ang panagsuod sa atong pamilya? Nagtudlo kaha kita og maayong kinaiya ngadto sa atong mga anak? Kini ba nga batasan ang gusto nato nga ilang sundon ug ipasunod ngadto sa ilang pamilya?
Para kanako, angayan gyud nga hinay-hinayan na nato sa pagputol ang mga dili maayong kinaiya, ug ibalik nato pagtudlo sa atong kabatan-onan ang mga maayong batasan nga nakat-onan nato gikan sa atong mga ginikanan.
* * *
Atangi ang sunod natong lindog karong Domingo.