Medyo naukay ang mga konserbatibong Romano Katoliko sa pag-abli ni Pope Francis sa debate mahitungod sa posibilidad nga tugotan ang mga lalaking minyo nga magpari, ilabi na didto sa Brazil.
Kini gumikan sa padayong pagnihit na sa mga pari, dili lang gani didto sa Brazil, kon dili, bisan sa ubang bahin sa kalibutan. Ang pangutana, dili “nganong nagkanihit ang pari,” kon dili, nganong nihit na ang gustong magpari.
Kini ang angayan nga hinuktokan sa simbahan kay bisan unsaon nila pagpahigayon og vocation search, kulang g’yud ang gidaghanon sa mga gustong magpari.
Kadtong mga batan-on nga mosulod sa seminaryo maayo nalang kon naa g’yuy molahutay ug mahimong pari.
Unsaon man pagkabig sa mga pari ang mga tawo pagsunod sa ilang tunob kon kutob lang sila sa pulpito, nga makita lang panahon sa misa ug magsermon dala pangasaba sa mga nanimba?
Dili man hinoon tanan kay daghan man ko og higala nga mga pari nga duol sa katawhan kinsa makighugoyhugoy g’yud sa mga tawo.
Apan duna usa’y lisud g’yud duolon sa mga tawo, ini’g human sa misa, deretso og sulod sa kombento ug dili na makita.
Gani kasagaran sa mga pari dili g’yud magpa-interview sa media, ngano man?
Angayan unta nga gamiton nila ang media ma-mainstream o social media aron maduol sila sa katawhan. Labaw sa tanan mo-reach out sila sa mga tawo. Pwede gani mag-house to house sila ug makig-estorya sa mga parokyano.
Ang ubang relihiyon kugihan kaayo mohimo niini busa daghan g’yud sila og nakabig nga mga Katoliko ra ba gyud ang ilang nadani.
Gikinahanglan na ang priest visibility sa simbahang Katoliko aron mahimo silang “LODI” o idol sa mga tawo nga gustong magpari.