Husto si Senate President Ralph Recto nga wa’y kapuslanan kay lunlon langay-langay lang ang lagda nga kinahanglang moagi ug aprobahan una sa kadagkoan sa National Disaster Risk Reduction and Management Council (NDRRMC) sa Kampo Aguinaldo ang weather advisories sa dili pa ma-text blast sa mga kompaniya sa telepono ngadto sa ilang subscribers sa mga dapit nga maagian sa mga bagyo ug ubang katalagman.
Mao diay nga kasagaran sa text messages nga nagpasidaan sa nangagi nga mga bagyo sa Sugbo ug silingang mga lalawigan atong nadawat dihang gumagawas na ang mga bagyo.
* * *
Tukma ang paniid ni Recto nga wa’y ikapuno ang NDRRMC sa forecasts sa Philippine Atmospheric, Geophysical and Astronomical Services Administration (PAGASA). Labaw na nga wa sila’y katakus sa pagkuriher sa kasayuran gikan sa tinuod nga mga eksperto sa kahimtang sa panahon.
Bugtong nahimo sa binuang nga lagda mao ang paglangay sa dinalian nga kasayuran nga angay g’yud untang mapadangat dayon sa mobile phones sa mga molupyo aron nga makapangandam dayon sa ilang mga pinuy-anan, makahipos dayon sa ilang kabtangan ug kahayopan, o maka-bakwet dayon sa mas luwas nga mga dapit.
* * *
Ang nakaplagan ni Recto nisunod sa awhag ni Senador Grace Poe nga tukuron ang buwag nga departamento nga moduma sa mga pangandam sa mga katalagman, molikay sa mga molupyo gikan sa kadaot ug motabang sa mga biktima.
Mahimo hinuong dili kinahanglan nga palingkuron sa gabinete ang tagdumala sa NDRRMC aron nga mahimong mas epektibo. Mahimo nga ang gikinahanglan mao ra nga pagtarong sa mga lagda aron nga mas paspas nga makapangandam ug makatubag sa mga emerhensiya.
* * *
Samtang sublion nila ang mga lagda sa NDRRMC, mangahas mi og saling-it sa mosunod nga mga sugyot:
Dili angay’ng maghuwat og bagyo una mag-text blast kay usahay mas dako ang kadaot ug mas daghan ang makalas bisan low pressure areas (LPAs) ra’y makit-an sa PAGASA, o pat-ak pat-ak nga bunok sa uwan ra’y ilang mamatikdan; ug
Angay’ng magtinabangay ang mga eksperto sa PAGASA ug Telcos pag-umol sa labing sayon nga sabton nga text messages nga molaktaw sa teknikal nga mga termino apan mohatag sa mga molupyo sa labing tukma nga sukod ug epekto sa gikusgon sa hangin ug gidaghanon sa uwan.
* * *