Pipila na lang ka semana, moeskwela na ang atong kabataan sa pampubliko ug pribadong tunghaan. Gani pipila ka mga publiko nga tunghaan nangandam na alang sa pagpahigayon sa tinuig nga programa nga Brigada Eskwela karong sunod semana.
Ang inyong kabomberohan apil sa nangandam sa pagbukas sa klase pinaagi sa pagpahigayon og subsob nga inspeksyon, dili lang sa mga tunghaan, kun dili, lakip na usab sa mga boarding houses ug dormitories nga istaran sa mga estudyante.
Kini aron sutaon kun luwas ba kini nga kapuy-an sa atong kabataan. Nasayod na man kita nga nikuyanap na ang mga boarding houses nga kun atong tan-awon, ang uban niini maisip nga “fire trap” kay wala kini mag-agi sa opisina sa kabomberohan.
Gihimo kining maong mga boarding houses ug dormitories nga wala’y permiso sa City Hall ug sa Bureau of Fire Protection (BFP). Mao kini ang nakadelikado kun dili mainspeksyon kay sigurado nga dili gyud makita ang kalapasan sa Fire Code.
Niadtong nag-operate og mga boarding houses ug dormitories, ayaw kamo pagpanuko pagtawag sa opisina sa atong kabomberohan aron nga mabisitahan ug masusi ang inyong paabangan nga edipisyo.
Atong isiguro ang kaluwas sa atong mga estudyante nga maoy mopuyo niini aron dili kini mahimong biktima unya sa sunog. Sa mga ginikanan, angayan gyud nga magpili kamo og luwas nga puy-anan sa inyong mga anak, ug ayaw mo pangyawat sa barato apan anaa sa risgo nga sitwasyon ang inyong kabataan.
* * *
Sa pikas bahin, akong mga pasiuna nga pahalipay sa tanang mga inahan kay saulogon man nato ang adlaw sa mga inahan ugmang adlawa. Happy Mothers day!