Bentaha gayud nga ning atong panahon, sa pakigbisog sa kinabuhi sa unahan aron maangkon ang gidamgo nga kahamugaway, magbaton kita’g kalig-on sa panghunahuna.
Kini ang mogiya kanato sa kaseguroan, gahom ug birtud kini, nga palig-onon usab nga makab-ot ang katumanan sa ato’ng mga laraw o pangandoy sa kinabuhi. Busa panaminan nato ang kinaiya, sa dili gusto buhaton sa tawo nga duna’y lig-on og panghunahuna. Ania ato’ng ipadayon:
* Dili mahadlok mag-inusara – uban sa ila’ng panghunahuna, nga nagpahimulos sa mga produktibo nga higayon o oportunidad. Nalingaw sa panag-uban apan wala magsalig sa kalipay nila, kun dili malipayon nga nag-inusara, sa pagnunot sa mga kalamboan sa napanday nga kalihokan.
* Di nila isipon o batyagon nga ang kalibutan utangan nila – sa bisan unsa nga butang – ang lig-o’g panghunahuna, wala mobatyag nga sila may katungod sa tanan nga butang. Dili sila maghunahuna sa uban, nga sila agakon o sapnayon o ang kalibutan mohatag gayud nila sa mga butang. Kun dili mao’y ilang gipangita ang mga oportunidad, nga gibase sa tumang paningkamot ug katakos nga buhaton ang tanan kutob sa masarangan.
* Dili magpaabot og diha-diha nga resulta – sa pagpahimsog o pagpalambo sa lawas ug maingon man sa negosyo, wala nila paabota nga kini moresulta dayon. Kun dili mao’y gigamit kanunay ang kaugalingon nga katakos, ug ang kahigayonan, hangtud dili pa mapupos ang ila’ng abilidad. Maunongon sa pagpailob, nga moabot ang usa ka adlaw nga dawaton ang ilang gipangandoy.
* Dili maghinakog ug andam motabang – usa ni sa hiyas sa mga tawo nga duna’y lig-o’ng panghunahuna, nga moabag sa nanginahanglan sa ilang katakos o abilidad sa pagkab-ot sa ilang kalampusan.