Giigo og sunog ang Lower Genes sa Barangay Quiot, Dakbayan sa Sugbo kaniadtong kaadlawon sa Biyernes Santo. Ang sunog miugdaw sa ibabaw nga bahin sa panimalay ni Eric Lingao-Lingao nga atol sa maong higayon nagbakasyon uban sa iyang pamilya. Matud sa mga nakasaksi nga nibuto ang airconditioning unit sa balay ug maoy sinugdanan sa sunog.
Ang leksyon nga atong makuha sa maong sunog mao nga sa dili pa manglakaw alang sa taas nga bakasyon, seguraduhon gyud nga sirado ang balay ug napawong ang kuryente sa mga appliances.
* * *
Naandan na gyud sa akong pamilya nga mosugat sa pasko sa pagkabanhaw, apan wala kami makahimo niini niadtong Domingo tungod sa uwan nga mugna sa tropical depression nga Crising. Hasta ang surprise unta nako sa pamilya nga laag sa lungsod sa Alcoy, wala pud madayon. Pero mas dili maayo ang kasinatian sa pamilya ni Ma’am Letty, usa sa mga suki nako nga tigpaminaw sa akong programa sa Super Radyo Cebu.
Giasoyan ko ni Ma’am Letty nga ang balay sa iyang anak nga nahimutang sa ubos nga bahin, natumpagan sa pader sa Camella Homes nga nahimutang sa ibabaw nga bahin ug didto kini mapunta sa kuwarto. Salamat na lang nga nakadagan ang iyang anak ug apo, pero guba kaayo ang kuwarto. Alas 12 sa tungang gabii kaniadtong Domingo ilang gitawagan ang kapitan sa Barangay Lawaan-1 aron magpatabang apan giingnan lang sila nga inigkabuntag na sila atimanon.
Pagkabuntag wala’y kapitan nga nagpakita. Ilang giadto ang barangay hall, apan wala’y tawo. Tungod sa kakusog sa tubig, ang imburnal sa Camella misugwak ug ang tubig nga pwerte kabaho, mibaha ug misulod sa kabalayan sa ubos. Apan wala’y opisyal sa barangay ug Dakbayan sa Talisay nga nagpakabana. Sa panahon sa kalamidad, wala diay mapangayoan og tabang ang mga taga Lawaan-1 ug Talisay City? Pag tsur mo uy.