Bakasyon na sa mga tinun-an kinsa nakaginhawa na gyud intawon sa pressure sa eskwelahan.
Pahulay grande sa karon, dili na momata og sayo, dili na sad magkuray sa katugnaw inig kaligo kay wala na may klase.
Siyempre ang mga ginikanan makapahulay na usab kadiyot sa galastohan.Dili na mangalot sa kalotonon sa pagpangita og ipabalon sa mga anak.
Bitaw temporaryo lang kini sanglit inig abli na sad puhon sa ting eskwela magkapuliki na usab asa manguha og igasto alang sa pagtungha sa mga bata.
Busa karon pa lang kamong mga tinun-an mangita na og sideline o summer job aron makatabang usab sa inyong mga ginikanan. Ayaw intawon kamo pagpaanod sa inyong katapol tungod kay bakasyon lagi. Seguro ang uban magkugi dili sa trabaho kun dili kugihan kaayo sa pagpindot sa mga gadgets kay nabuang na sa facebook ug uban pa nga mga games sa gadget.
Kung walay summer job nga kasudlan, hala tabang sa pag-asikaso sa gimbuhaton sa panimalay o ba kaha moabag sa pagpaninda o sa bisan unsa nga panginabuhi sa mga ginikanan.
Maayo na lang inig abli puhon sa klase duna nay ikapalit sa mga kagamitan.
Samtang kadtong mga kaya kayahan mahimo usab nga i-enroll ninyo ang mga bata sa mga summer classes aron mapalambo pa ang katakos nila sa lawas ug sa salabotan. Sa dakbayan sa Lapu-Lapu adunay libre nga mga pagbansaybansay sa arnis ug uban pang paugnat sa kusog. Maayo kini alang sa mga gustong makakat-on sa self defense.
Mahimo ra nga moadto sa Hoopsdome ang interesado nga moapil. Mas maayo nga productive ang mga bata bisan og sila nakabakasyon.
Kini ang vacation with a purpose. Bitaw depende lang g’yud ning tanan sa mga ginikanan ug mga anak kun unsaon nila paggamit ang panahon sa ilang bakasyon.