Midangop sa buhatan ni Konsehal Harry Radaza, acting Vice Mayor sa dakbayan sa Lapu-Lapu, ang mga nabiktima sa pagpangilad diin ang mangingilad migamit lang sa iyang tingog sa telepono.
Unang nabiktima ang usa ka pizza delivery man diin adunay lalaki nga nanawag sa ilang tindahan kay magpa-deliver og pizza nga balor og P3 mil. Sumala sa delivery man nga nagpaila ang caller nga si Konsehal Harry Radaza ug miingon nga ipahatod ang pizza sa iyang buhatan sa City Hall.
Apan namalihog ang caller nga pahapiton kini sa drug store kay dunay ipapalit nga tambal ug nihangyo nga pagamiton og kwarta, ug adto na bayran kun moabot na sa City Hall. Dihang didto na sa drug store, nitawag na usab ang caller kay makig-estorya sa tindera.
Ang nagpaila nga Konsehal Radaza midugang og hangyo sa delivery man nga mamalihug na sab og load sa cellphone. Atubangan sa pharmacy, nakakita siya og cellphone loader ug ang caller na ang nakig-estorya sa tag-iya sa tindahan. Nagpaila na sab kini nga si Radaza ug nagpa-load kini nga mikabat gyud og kapin sa P22 mil sa walo ka transaksyon.
Ang tag-iya misalig sab kay naa man pud ang delivery man sa pizza nga abi niya og kaila sa caller. Ulahi na diha nga nakamatikod sila nga na- scam na sila gamit lang ang tawag sa cellphone. Kompirmado dihang niadto sila sa buhatan sa konsehal kay giingnan sila ni Radaza nga wala siya manawag.
Sumala sa konsehal nga ka tulo na ka higayon nga nagamit ang iyang ngalan sa mga tinonto, busa panawagan niya sa mga tawo nga dili motuo sa mga transaksyon, ilabi na kun dili kaila ug labaw na kun sa telepono lang.
Daghan na gyud kaayo ang tinonto karon busa kinahanglan gyud nga magmatngon aron dili mabiktima sa mga tawo nga wala’y konsensya kay maayo ra ba kaayo sila mangombinser, laway ra ang ilang puhonan sa pagpangilad.
* * *
(alan75domingo@gmail.com)