Usahay sa dili hibaw-ang mga hinungdan sa panahon nga gusto na kitang matulog, maglabad na lang atong ulo og piniyong, dili g’yud katulog kay unsaon nagdibal pang buhi ang panumdoman, nga nakahasol sa pagpahuway. Mura’g init ang kalawasan nga nag-alindasay. Bisa’g puston pang ulo, di gyud katulog.
Kun makatulog man, magsige sab og kamata-mata ug mobangon, iyawat dukaon nga maglingkod, apan igo lang gidungoy ang ulo nga gawandog-wandog mura’g nahubog. Unsaon ‘sab wala man gud ihikling una sa kalimot, ang presyur sa kaakohan nga wala matibawas sa adlaw nga kombatihay sa kaakohan.
Dili lalim ang ingon ining sitwasyon, malobat kitang mawad-a’g kusog nga nagsige’g andar ang panghunahuna. Angay unta ang mga akatahonon pa, i-angan-angan na ngadto sa ini’g mata pagkaugma, igo sab kapahuway ang utok. Madugayan ra ba mablangko ang ulo nga nadaut ang himsog nga paminsar.
Busa kun makasinati kita’g dili maayo’g kinatulgan, ayaw pasagdi nga mosangpot kini nga mahimong grabeng magkasakit ini. Magkaproblema ang katibuk-ang sistema nga makapainutil sa lawas nga mobalda sa atong kalihokan. Adunay natural nga remedyo nga girekomendar aron kita makatulog dayon.
Pinaagi kini sa 3ka sagol, sama sa mga mosunod;…(1) 1ka kutsara sa lana sa lubi (coco oil) mas maayo ‘cold pressed’ o virgin oil…(2)1/4ka kutsara sa dugos o ‘raw honey’ ug (3) 1/8ka kutsarita sa ‘rock salt’ dili ‘iodized’.
Ang maong mga ‘ingredients’ makatabang sa lawas nga kita makatulog, kay makapaus-os kini sa ‘stress hormones’ o ‘cortisol’, nga maoy motukaw sa utok.
Kun unsaon kini nato sa pagpreparar, aduna kini duha ka kapilian (1) Kutawa nga isagol ang ‘coco oil’ ug ang ‘raw honey’. Ibutang sa sudlanan, ug idugang ang ‘rock salt’. Unya moinom ka ini’g 1ka kutsara, dayon patabani’g tubig.