Kun moadto ka sa mga bilanggoan ug pangutan-on nimo ang mga binilanggo kun tinuod ba nga nakahimo sila og salaod, ingnon ka dayon nila nga biktima ra sila sa pasangil.
Panagsa ra gyud kaayo nga adunay mga piniriso nga moangkon nga sila sad-an, ilabi na kun masayod sila nga ang nangutana kanila sakop sa media.
Apan sigurado usab ko nga kun sila na lang nga mga binilanggo ang magsultihanay, magtug-anay sila sa ilang mga kabuang.
Susama ra kini dihang duna ko’y ig-agaw nga gidakop sa kapolisan kaniadto kay kuno nakapusil. Pag-adto nako sa police station diin didto siya gibilanggo, gisugat ko niya pag-ingon nga gitumo-tumoan ra siya sa iyang agawon nga nasuko kaniya.
Ang giingong gipusil sa akong ig-agaw mao ang iyang agawon. Apan miinsister gyud ko nga ang akong ig-agaw motug-an nako sa tinuod aron makahatag ko kaniya og abogado nga molaban sa iyang kaso.
Tuod, mitug-an na siya nga tinuod nga iyang gipusil ang iyang agawon samtang nagduwa og mahjong. Ang ubang dinakpan moangkon dayon human sila masikop, apan kun tua na sa bilanggoan, usbon na ang ilang pamahayag.
* * *
Karon ang pangutana mao kini. Pabor ka ba nga ibalik pagpatuman ang death penalty, kon pagpahamtang pagbalik og silot nga kamatayon sa mga makahimo og grabeng salaod?
Lisud gyud hinoon ang paghukom niini, gawas lang kun magpaturagas ka lang sa pagtubag. Kun moingon ka nga pabor, angay’ng hinuktokan nga basin napasanginlan lang ang usa ka kabus ug kay wala may maayong abogado, nakonbikto.
Kun ibalik man gyud pagpatuman ang death penalty law, tingali kinahanglan nga ang mga huwes nato sa hukmanan, angay’ng magbaton gyud og kaligdong nga dili na gyud matintal sa “silaw sa bulawan.”
Kinahanglan nga ang mga huwes dili magpanuko sa pagpahamtang og silot ngadto ni bisan kinsa, adunahan man o kabus, basta makita niya nga kini sad-an gyud. Kay daghan man nga mga kabus nga dili maka-afford pagkuha og maayong abogado, magsalig ra gyud sila sa Public Attorney’s Office.
Angay usab nga ang PAO, mangita gyud og mga maayong abogado apan kinahanglan usab nga usbawan ang ilang sweldo aron nga madani kadtong mga de-kampanilya nga abogado sa pagpangaplay kanila.
Gawas nga de-kampanilya nga abogado ang kuhaon sa PAO, kinahanglang daghan usab sila og mga sakop kay aron dili kay ang usa ka abogado maghupot og puwerteng daghanang kaso nga dili na hinoon maatiman pag-ayo.