Sa akong pagbisita sa Bien Unido Catholic Cemetery sa lungsod sa Bien Unido, Bohol aron pagbisita sa akong mga kaliwat nga atoa na sa laing kalibutan, akong nakita ang kadako na gayud sa kausaban niini.
Dagko na ang mga nitso ug namarog na usab ang mga harianong musoleyo, ilabi na gayud sa kasikbit nga pribadong sam-ang katoliko.
Hinuon ang akong nakita sa maong mga sam-ang, sukwahi sa akong nakita sa sam-ang katoliko sa dakbayan sa Sugbo diin nag-ipon na sa pagpuyo ang mga buhi ug patay. Ang sam-ang sa among lungsod pulos patay pa ang nagpuyo.
Bisan sa mga sam-ang imong makita ang kadako sa gintang sa mga kabus ug adunahan, ug kini imong makita dili lang sa among lungsod sa Bien Unido, Bohol kun dili sa uban usab nga dapit sa nasud.
Bisan sa kamatayon. ang kakabus mabawon sa tawo sa iyang lubnganan. Ang kakabus padayon niyang giantos ug giagwanta. Hinuon patay na sila ug ato na lang iampo nga ang ilang mga kalag mapunta sa harianong gingharian sa langit.
Ari na lang ta sa mga buhi nga miipon sa pagpuyo sa mga patay tungod kay walay balay nga kapuy-an. Ang gobiyerno ni Presidente Rodrigo Duterte mohatag na unta nila og pagtagad ug sa tanan nga walay mga pinuy-anan.
Hatagan na unta sila og desinting kapuy-an. Ang gobiyerno mohimo na unta og programa nga pabahay nga dili negosyo kun dili tininuod gayud nga serbisyo.
Ang programa gud nga pabahay karon sa gobiyerno mahal man nga bisan gani ang may mga trabaho dili makaabot sa prisyo niini.
Sa akong nakita sa mga sam-ang diin namarug ang mga dagko ug harianong mga mosuliyo ug miipon na sa pagpuyo sa mga patay ang mga buhi makaingon ka nga mas maayo pa ang mga patay kay nahatagan pa sila og nindot nga pinuy-anan.