Mitumaw na usab kining mga grupo nga mobabag sa pagbalik sa ROTC isip mandatory nga subject sa college.
Ang Catholic Educational Association of the Philippines (CEAP) pinaagi sa ilang presidente nga si Bro. Narciso Erguiza nagkanayon nga ang ROTC dili solusyon sa nasud pagpreparar sa gubat.
Miingon pa gyud si Bro. Erguiza nga “counter-productive” ang ROTC tungod kay dili tanang lalaki ug babaye gustong magsundalo.
Walay kabutangan sa akong katawa sa mga rason ni Bro. Erguiza. Una, bisan wala pay gubat, ang ROTC gikinahanglan alang sa atong kabataan. Ang ROTC maoy labing nindot nga training aron itisok sa kabataan ang “sense of patriotism, nationalism, ug love of country.”
Nakabantay man tingali kita, apil na si Bro. Erguiza, nga ang kabataan karon wala na gyuy mga batasan. Dili na gani maantigong mohunong bisan makadungog og tukar sa Nasudnong Awit, kay wala naman ma-train nga kun awiton ang Lupang Hinirang, kinahanglan mohunong gyud ug moatubang sa bandila, o asa ang tukar.
Suroy kamo sa Colon, makit-an ninyo ang kabataan nga kanunay’ng molapas sa balaod sa jaywalking. Pipila na lang ang motabang pagpalabang og tigulang, motindog ug ihatag ang iyang lingkoranan kun adunay tigulang o mabdos?
Apan nasayod ko unsay rason nganong ang mga Catholic schools (dili tanan), dili ganahan nga himuong mandatory ang ROTC. Kini tungod sa isyu sa gibayad sa estudyante sa pag-enrol niya og National Service Training Program.
Base sa Akta Republika 9163 kon NSTP Law of 2001, ang estudyante mahimong mopili unsay iyang NSTP subject – Civic Welfare Training Service (CWTS), Reserve Officers’ Training Corps (ROTC), o Literacy Training Service (LTS).
Adunay mga pribadong kolehiyo o unibersidad nga mo-hire og NSTP director nga bias sa ROTC. Ngano man? Aron pinaagi sa iyang inpluwensiya, kadaghanan sa mga estudyante adto mo-enrol sa CWTS.
Unsay rason nganong dili gusto ang maong mga tunghaan nga daghan mo-enrol sa ROTC? Kay mandato sa balaod nga adunay pahat ang Armed Forces of the Philippines sa kita (proceeds) sa enrollees nga adunay units sa ROTC. Gusto sa mga pribadong tunghaan nga solohon lang ang kita sa NSTP subject.
Mas grabe ang panawagan sa walhon nga party-list group nga Kabataan, pinaagi ni Kongresista Sarah Elago, kay gusto gyud nilang i-abolish ang ROTC. Tungod lagi sa bayolenteng kasaysasayn sa ROTC human usa ka kadete sa University of Sto. Tomas namatay tungod sa hazing.
Apan atong klarohon nga si Mark Welson Chua namatay dili tungod sa ROTC, apan tungod sa hazing. Kun problema ang hazing sa ROTC, angay ba kining himuong rason nga undangon ang ROTC? Mao ra siya og kun si Kongresista Elago ug si Bro. Erguiza sakitan og ulo, dili sila mangita og tambal kay para nila ang solusyon mao ang pagputol sa ilang liog.