Sa nagkaduol nga eleksyon, angay nga mao nay pangitaon sa mga botante ang plata porma de panggobiyerno ug dili na kun si kinsa ang sikat nga kandidato.
Kini aron motaas ang kalidad sa pagpangampanya sa mga kandidato ug ang matang sa pagpili sa mga botante. Angay nga ang pangitaon sa mga botante ngadto sa mga kandidato sa ilang pagpangampanya mao na ang plano niini ug dili ang iyang kaguwapo ug ang pagka maayo mokanta.
Dinhi sa dakbayan sa Sugbo mao kini ang mga isyu nga angayang sutaon sa mga botante, ang baruganan sa mga kandidato.
Una ang isyu sa pagbayad sa utang sa dakbayan sa pagtukod sa South Road Properties nga base sa kontrata bayran kini hangtod pa sa 2025.
Si Mayor Mike Rama gusto nga mabayaran dayon ang maong utang aron dili na magbayad ang dakbayan og kapin P500 milyones ang tuig, apil na ang interest.
May kuwarta na ang City Hall kay nakabaligya man kini og 26 hektareyas nga yuta ngadto sa Ayala-SM consortium ug Filinvest Land Inc.
Apan si Tomas Osmeña dili gusto nga bayaran ang utang ug gastohon ang salapi sa ubang mahinungdanong proyekto.
Ikaduha nga isyu mao ang pagsulod sa siyudad sa real estate business. Si Mayor Rama gusto nga ibaligya dayon ang luna sa SRP aron magamit ang halin sa mga nakahan-ay nga mga programa, apan si Osmeña gusto nga anam-anamon lang kini sa pagbaligya kay kun magkadugay, magkamahal kuno ang presyo sa yuta.
Ikatulo, mao ang pagkuha sa mga “center island” sa karsada. Gusto ni Rama nga kuhaon kini sa mga karsada aron moluag ug limpyo nga tan-awon.
Si Osmeña gusto nga adunay center island ang mga karsada ug may mga babag sa daplin. Kun pangutan-on kamo asa ang inyong nagustohan, kang kinsa man nga baruganan ang inyong nauyonan, kang Mike o kang Tomas?