Sa miagi’ng isyu, mao’y gihisgutan nato ang kalihokan sa mga empleyado, nga pulos nahimong produktibo sa ilang panarbaho. Ang ulahi’ng naipresentar nga gihimo nila, mao ang mahitungod sa pagsulat sa 3 ka prayoridad nga humanon ang gimbuhaton sa tibuok adlaw. Karon, atong ipadayon:
* Repasoha ug kompirmaha – ang nahimo segun sa nahan-ay nga lista o tamdanan, kun nahimo ba gayud ang mga trabahuonon anang adlawa. Iplastar ang kausaban kun may angay pa’ng idugang o ikoreher.
* Isulat ug affirmaha ang mga nahimo anang adlawa – iseguro nga ang tanan doble nga gitsek-ap nga kompleto natuman, nga matawag nato’ng nabuhat gyud ang mga tumong sa kahumanan. Matud ni Mathew D. Della Porta, nagsulat sa “The how of happiness’’ ... nga simple o sayon ra kaayo himuon kada adlaw, ang pagtukma kanunay sa mga gimbuhaton nga nakatahas - maoy pagdisiplina, sa tinud-anay nga gugma ug kombiksyon o interes sa pagtrabaho.
* Mobasa una’g makapadasig nga mga panultihon (qoutations) – sa dili pa mosugod sa trabaho. Sa ingon mopiskay ang galamhan, nga mahimo’ng aktibo o kusgan ang panglawas, sa pagtangka nga malipayon ang kaugalingon.
Mogaan ang panghunahuna, sama niini’ng panultihon… “Molampos ang tawong mag-antos”…”Kun kugihan may padulngan”… “Dili modaug kun mosibog”…ubpa.
Kun kini’ng mga giya o tamdanan sa mga tawong produktibo sa ilang mga trabaho, igo na maghatag kanato nga malampuson sa unsa ma’y gusto mahitabo nga magmalambuon sa tana’ng pangandoy niini’ng kinabuhia. Kanunay sud-Ungon ang kaugalingon sa mga gikinahanglan nga kausaban sa tanang higayon. Nga way lugar nga mausik ang oportunidad nga motuktok kanato. Aron kita kompiyansa na nga permi madaugon sa kinabuhi, nga tugob sa kulbahinam.