Niining pag-arangkada sa bag-ong tuig, mikusog usab ang kampanya sa otoridad batok sa ilegal nga druga sa probinsiya sa Sugbo. Sa niaging mga semana, sunod-sunod ang mga pagpangronda nga gihimo sa kapolisan ug ubang ahensiya sa kagamhanan.
Ang usa sa ulahi ug dakong operasyon sa otoridad mao kadtong raid didto sa lungsod sa San Fernando sa niaging semana. Sa maong operasyon, duha ka managsuon ang nasikop ug subra sa P3 milyones nga kantidad sa ilegal nga druga ang nasakmit sa mga operatiba sa National Bureau of Investigation.
Didto usab sa lungsod sa San Francisco sa isla sa Camotes, usa ka magtutudlo, iyang bana ug tulo ka anak ang nasikop atol sa ronda sa kapolisan kaniadtong Enero 12. Ilegal nga druga nga mokabat sa P2 milyones ug pipila ka armas ang nasakmit sa otoridad.
Kudos ngadto sa otoridad, ilabina sa kapolisan kinsa kugi karon sa ilang kampanya batok sa ilegal nga druga. Ug makapaabot ang mga Sugboanon og daghan pang operasyon nga ipahigayon sa kapolisan ug ubang ahensiya sa kagamhanan.
Maayo na lamang kay gipadayon sa bag-ong liderato sa PRO-7 ang kamandoan ni kanhi director Prudencio Tom Bañas sa mga kapolisan paggukod niadtong nalambigit sa ilegal nga druga sa Central Visayas.
Apan dako pa ang kulang aron nga maangkon ang kadaugan. Kinahanglan nga pakusgan pa sa otoridad ang ilang kampanya. Ug kini naglangkob sa paglapdos sa sampot niadtong mga sakop sa kapolisan nga nagmika sa ilang serbisyo.
Gani dako nga isyu karon ang giingon nga walay aksiyon sa kapolisan sa San Fernando batok sa binuhatan niadtong duha ka managsuon kinsa nadakpan sa NBI. Duol ra kuno sa estasyonan sa pulis ang drug den sa maong mga suspetsado.
Matud pa sa taho, hagbay ra kuno nga gireklamo sa mga residente ang maong drug den ngadto sa kapolisan tungod kay aduna kunoy mga estudiyante nga mosulod ug mosuyop og druga. Apan wala kunoy aksiyon nga gihimo ang kapulisan, hinungdan nga ang NBI na mismo ang mironda niini.
Dili gayud magsilbi ang krusada batok sa druga kung mismo ang kapolisan kulang sa paningkamot. Basin baya kun ang uban kanila apil sa payroll sa mga drug dealer. Usa gayud kini sa isyu nga angay hatagan og dakong pagtagad sa liderato sa PRO-7.