Ang nag-unang katuyoan sa pagpahigayon sa International Eucharistic Congress (IEC), gawas sa panagtapok sa mga Kristohanon diha sa pagtuong Katoliko, mao ang pagpasabot ug pagpalawom pa sa mga pagtulon-an nga gibilin ni Kristo ug sa mga balaod sa Simbahang Katoliko nga maoy tamdan sa mga ginsakpan niini.
Diha sa Kongreso ipaambit sa kaparian, relihiyoso ug sa mga layko ang ilang mga kasinatian sa presensya sa Ginoo ilabi na diha sa Eukaristiya kun ang lawas ug dugo ni Kristo nga girepresentahan sa pan ug bino nga gikonsagrar diha sa Santos nga Misa.
Si Bishop Robert Barron, DD, usa sa mga speaker nga nituki sa temang "The Eucharist: Celebration of the Paschal Mystery" nipahimug-at sa pag-ila ni Kristo, ang buhing pan nga maoy mohatag kanato nga nituo Kaniya sa kinabuhing wala’y katapusan.
Gipahimug-atan ni Bishop Barron nga taliwa sa ka moderno sa teknolohiya ug sa kadali na lang sa mga butang nga maangkon tungod sa kapaspas sa kalamboan, kining tanan dili gihapon makahatag sa tawo sa katagbawan nga iyang gipangita.
Tungod niini gidasig ni Bishop Barron ang mga Katoliko sa pagsimba ug sa pagsinati ni Kristo sa Iyang lawas ug dugo diha sa pag-ambit sa pangalawat.
Giangkon ni Bishop Baron nga nagkagamay ang mga nanimba, ilabi na didto sa America, bisan sa mga parokya nga iyang gidumala kaniadto sama sa Chicago ug karon sa Los Angeles, California.
Iyang giangkon nga kinahanglang makabig pagbalik ug magka-interes ang mga manimba sa aktibong pagsalmot sa mga kalihukan, ilabi na sa pagsaulog sa Santos nga Misa, tungod kay diha sa misa personal nato nga makahimamat si Kristo pinaagi sa Eukaristiya.
Si Gaudencio Cardinal Rosales sa iyang wali sa ikatulong adlaw sa kongreso nihagit ug nisukna sa mga delegado sa ilang kaandam sa pagdawat sa Eukaristiya nga mao si Kristo.
Gipasabot sa Cardinal nga sa pagdawat ni Kristo nagpasabot kini sa kaandam sa pagsinati sa mga pag-antos, kasakit ug pagsakripisyo. Sa mga andam modawat sa Eukaristiya kinahanglan nga andam siya nga mopas-an sa krus.
Matud ni Cardinal Rosales nga diha sa atong pagpakasala nga atong nailhan si Kristo, ug nga diha sa atong pagkaila ni Kristo, kinahanglan nga ato kining isabwag ug ipaambit dili kutob lang sa simbahan, kon dili, ngadto sa pamilya ug sa katilingban.
Gipasabot sa Cardinal nga diha sa pagdawat sa Eukaristiya nga kita mausab ug mahimong maayong tawo. Nga sa atong pagkamaayo, mahimo kitang manggiluy-on ngadto sa atong isigkaingon.
Nga si Kristo pinaagi sa Eukaristiya mohupay sa kasakit sa kawad-on, motapos sa kagubot ug gubat, ug moalim sa mga samad ug kasakit sa kaaway. Nga diha sa atong pagdawat sa Eukaristiya mahisama kita ni Kristo. Sama sa panultihon, "you are what you eat."