Gihinumdoman ni Cebu Archbishop Jose Palma ang pormal nga katin-awan ni Pope Francis nga si Hesukristo, labi na ang iyang pagka Sr. Sto. Niño, mao ang dagway sa kaluoy. Nga maoy usa sa mga sukaranan sa pagdeklarar sa Vatican karong tuiga nga balaanong tuig sa kaluoy. Sa iyang wali sa Misa Pontifical sa Piyesta Senyor sa Basilica Minore del Sto. Niño gahapon, gisubay ni Palma nga ang labing unang pasundayag sa talagsaong gahom ni Sr. Sto. Niño, nga maoy nahimong simbolo sa Kristiyanismo sa Sugbo sa kapin sa 450 ka tuig, mao ang pagpahilak niya sa pagano pang si Hara Juana. Kansang pagpaundayon sa kahigwaos sa pagsayaw gihulagway ni Palma nga labing unang Sinulog.
* * *
Ang mas hingpit nga pasidungog sa paggakos sa mga Pilipinhon ni Sr. Sto. Niño gihimo ni Pope Francis sa iyang Misa sa Luneta nga naatol sa Piyesta Senyor sa niaging tuig. Tuguting mangahas ko pagkutlo sa pipila ka mahinungdanong bahin:
Ang imahen sa Batang Hesus nikuyog sa pagsangyaw sa Ebanghelyo ning nasura sukad sa sinugdanan. Gisul-oban sa kapa ug korona sa hari ug nagkupot sa kalibotan ug krus, padayon siyang nipahinumdom nato sa kalambigitan sa Gingharian sa Ginoo ug sa misteryo sa espirituwal nga pagkabata. Gitudloan ta niya nga ang di modawat sa Gingharian sa Ginoo sama sa bata di makasud ini. Dihang nagpakatawo ang Batang Hesus, gihulga ang iyang kinabuhi sa kurakot nga hari. Si Hesus mismo nagkinahanglan sa panalipod nilang San Jose ug Birhen Maria sa Nazareth. Gipahinumdoman ta niya sa kamahinungdanon sa pagpanalipod sa atong mga pamilya. Kinahanglan nga atong panalipdan, giyahan ug dasigon ang atong kabataan, tabangan sila pagtukod og katilingban nga takos sa bantogang espirituwal ug kulturanhong kabilin. Di nato sila tugotan nga mahikawan sa paglaom ug tungluhon sa kinabuhi sa kadalanan.
Usa ka huyang nga bata ang nakadani sa kaayo, kaluoy ug hustisya sa Ginoo ngadto sa kalibotan. Gisuklan niya ang pagpamakak ug pangurakot nga maoy mga kabilin sa sala, ug nidaog siya batok nila sa gahom sa iyang krus. Ibayaw ko kamo ni Hesus. Hinaot nga iyang himuong takos ang hinigugmang mga Pilipinhon sa pagtinabangay, pagpanalipod sa usag-usa, sugod sa inyong mga pamilya ug mga katilingban, sa pagtukod og kalibotan sa hustisya, kaligdong ug kalinaw. Hinaot nga ang Santo Niño padayong mobendisyon sa Pilipinas.
* * *
Niduyog ang kabataan sa kadalanan sa Sugbo sa pagsulbong sa kasadya sa Sinulog Grand Parade gahapon. Samang niduyog sab sila sa kasolemne sa mga Misa ug mga prosesyon sa Basilica.
Apan human sa kapiyestahan, magpabilin gihapon sila sa kadalanan. Bugtong konsuylo mao nga wa sila hiposa sa niaging Sinulog ug gipasaligan nga di hilabtan sa umaabot nga International Eucharistic Congress (IEC).
* * *