Maayong ipaimbestigar sa Sinulog Foundation ang pagpangguba sa mga props sa mga Sinulog contingent nga sakop sa Looc Norte National High School sa Asturias.
Kining ingon niini nga mga binuang dili angay tugotan sa Sinulog Foundation kun gusto niini nga magpabilin ang kredibilidad sa umaabot pa nga mga Sinulog contest.
Ang pagpangguba og props posibleng gihimo sa mga kaatbang nga contingent o mga contingent nga nahadlok nga mapilde sa nakita nilang katakus sa taga-Looc nga maoy migawas nga grand prize winner.
* * *
Gipamolitika sa konseho sa Mandaue ang kalihukan sa mga senior citizens pinaagi sa pagpanghilabot sa umaabot niining synchronized election. Si Konsehal Diosdado Suico nangamahan og resolusyon aron pag-adopt sa petsa eleksiyon sa mga senior citizens karong Enero 24.
Apan ang lakang sa mga konsehal nga alyado ni Mayor Jonas Cortes nagpakita lang hinuon nga desperado sila ni Kongresista Luigi Quisumbing tungod kay mayoriya sa mga senior citizens sa Mandaue dili man makig-estorya nilang Jonas ug Luigi, ug tua magkuyogkuyog kang Lolypop Ouano-Dizon ug sa ka-tandem niining si Beethoven Andaya.
Sa tanang lokal nga kagamhanan, ang Mandaue lang ang nagpasar og resolusyon aron hilabtan ang kalihukan sa mga senior citizens. Bisan sa pagsupak nilang Lolypop ug Beethoven, napilde sila sa numero. Tataw nga desperado ang grupo ni Jonas ug Luigi.
* * *
Dili kahibudngan nganong kanunay’ng masulod sa taas nga rating sa survey si Bise Presidente Jejomar Binay. Kun wala pa ipagawas sa Nielsen Philippines ang survey kinsay labing dako og nagasto sa mga TV commercial, dili kita mahibalo nga si Binay diay ang labing dako na og nagasto.
Hapit P600 milyones na ang nagasto ni Binay sa TV ads. Siyempre, ang epekto niini mao ang pagkasikat niya. Asa man og igasto sa TV ads si Binay? “Friends and supporters” dayon ang ipasangil nga nanghatag alang sa iyang kampanya. Kun modaog, wala ba kaha kini balos? Sa pagsugod sa election period kagahapon, nagkahanap ang tsansa ni Senador Grace Poe. Si Commissioner Rowena Guanzon ug Commission on Election Chairman Andres Bautista nagkasumpaki mahitungod sa ilang tubag sa Korte Suprema kalabot sa disqualification case ni Grace. Sa ato pa, hanap kining madesisyonan sa tukmang panahon.
Kay dehado man sa legal, pasikat na lang si Grace pinaagi sa pagbukas sa imbestigasyon sa Mamasapano encounter nga mipatay sa 44 ka SAF commandos. Gituyo nila kini aron iduot si Mar Roxas. Apan si Roxas nagpakita og kaisog pag-ingon nga gusto niyang atubangon ang imbestigasyon.
Apan para nako, unsa pa may bag-o sa imbestigasyon?
Para nako, duha ra gyuy, tuyo sa kampo ni Grace niini. Una, ang pag-grandstanding, ug ikaduha, ang pagduot ni Roxas.