Dear Atty. Divine,
May yuta ang akong apohan nga kabilin sa iyang mama ug wala pa kini mabahin sa iyang mga igsuon. Nangamatay na ang mga igsuon ni lola ug mga anak na lang ang nahibilin. Gusto sa mga anak nga kuhaon ang ilang share. Ang gusto unta ni lola nga kuhaan lang og gamay ang balay kay nasulod man kini sa ilang share. Pero dili sila mosugot kay gusto nila nga anha sa atubangan sa balay kuhaon ang portion sa ilang share sa yuta. Kay wala na man magkasinabot, ilang gipatawag si lola sa barangay. Ang akong pangutana, kinsa may dako og katungod? Si lola nga nag-atiman sa yuta sukad pa sa buhi pa ang iyang mama o sila ba nga mga anak na lang? Pwede diay sila makakuha og declaration bisan wala pa ma-transfer sa ilang pangalan? Dili pa gyud tukma sa original nga declaration. Unsay among buhaton? Unta matabangan mi nimo. — Jen
Dear Jen,
Ang imong Lola isip maoy nahibilin nga original heir sa maong yuta angayan unta nga maoy paminawon sa ubang mga heir. Hinuon, base sa balaod, ang tanang heirs sa property nga wa pa mabahin, patas og katungod, apan isip mga Filipino, morespeto gyud kita sa tingog sa atong katiguwangan, ilabi na kay siya na lang ang nahibilin nga original heir. Ang maayo ninyong buhaton karon mao ang pag-areglo na lang gyud sa maong problema sa inyong barangay ug suwayan ninyo og hangyo ang ubang heir sa unsa may gusto sa imong lola. Mas maayo nga mabahin kini karon samtang buhi pa ang imong lola. Kanang kopya sa Tax declaration mahimo man na nga kuhaon sa ubang mga heirs bisan kun wa pa kini matipak o ma-transfer sa ilang pangalan kay mangayo ra man ka og kopya niana sa Assessor’s Office. Kanang Tax Declaration number normal sab na nga mag-usab-usab ilabi na kun dunay mga revision nga buhaton ang lokal nga kagamhanan apan kanang Lot number ug mga boundaries, magpabilin gyud kana nga pareho sa karaan ug sa bag-o nga tax declaration. – Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.