May panultihon nga "Change for the better", ambot kun mao ba kini ang kausaban nga mas makaayo, ang ato karo'ng suhiron. Nga sa ingon, ato'ng kapanaminan pag-ayo, nga makutlo ang husto o ang angay nga buhaton. Aron matimbang ang tukma nga kausaban nga maghatag kaayohan sa kaugalingon.
Aduna ko'y suod nga silingan, nga way matago sa iyang kalihokan. Kay malantaw ra man gikan sa ako'ng pinuy-anan. Usa siya ka ilong twapos nga nahimong malampuson tungod sa kaugalingo'ng paningkamot. Alang kanako, talagsaon ang iyang pagkatawo. Kay di lalim ang nasinati niyang kalisdanan.
Kanunay siya nagmata sa katumanan sa iyang mga pangandoy. Subra ang kakugi nga mora'g dili bation og kakapoy. Ingon sa hadlok maapsan nga dili unya kaabot sa aniho'ng panahon. Aktibo nga dinalian kanunay ang iyang mga gimbuhaton. Masaypan siya nga garboso kay wala ma'y higayon sa pakigsuod.
Sukad ni niretiro sa pagka maestro sa elementarya, nibalhin ni'g puyo kay nakapalit og balay sa usa ka subdibisyon. Sud sa 2ka tuig, karon pa kami magkita diha'ng tuyo niya nga bisitahan ko, kay tigbasahan diay sa lindog nato. Duna siyay suliran sa panglawas, nga kaniadto piskay kaayo ang lawas.
Gisaysay niya kanako ang kausaban sa iyang kinabuhi, sukad siya nipahulay na sa serbisyo. Wa na siya'y presyur sa kinabuhi nga kanunay na lang nagyampungad sa kahayahay nga nagpaabot kanus-a motikyop nga mosilak ang adlaw. Wa siya'y masangpit sa kamingaw nga nag-inusara lamang sa kinabuhi.
Mao diay iya'ng tuyo, kun unsa ug ngano nga naingon na man hinuon siya niini. Akong gipasabot nga siya nabag-ohan lang sa gisagop niyang kausaban. Naapektahan ang lawas ug panghunahuna, nga wa na'y kahinam palihokon, nga mao unta'y kusog nga dili maulipon sa kaluyahon, nga karon siya nagmasakiton.